في اليوم العالمي للمغامرة: 5 أماكن للتنزه في الطبيعة حول الوطن العربي

في عصر ثورة الاتصالات، ووسائل التواصل الاجتماعي والتكنولوجيا العميقة اللي سيطرت على كل نواحي حياتنا، يبدو إننا فقدنا القدرة على التواصل مع النفس والآخر ومع الطبيعية.

وعلشان التواصل مع التلاتة دول على قدر كبير من الأهمية للاتزان النفسي والصحة الجسدية، مهم إننا ناخد إجازة من التكنولوجيا العميقة وأجهزة الاتصالات، وناخد بعضنا ونهرب لأحضان الطبيعة.

ومافيش أجمل من مهرب للطبيعة في مغامرة تسلق على جبل أو في محمية طبيعية، وعلشان النهارده 15 أكتوبر، هو اليوم العالمي للمغامرة، جبنالك كل التفاصيل عن 5 أماكن حول الوطن العربي تقدر تغامر فيهم وتهرب لأحضان الطبيعة.

تونس: جبل زغوان في ولاية زغوان

تنزه في الطبيعة
عن: journeyera

المنطقة الجبلية الرائعة في ولاية زغوان شمال شرقي تونس، بتتميز بمناظر خلابة، وبالإضافة لمساحتها الشاسعة اللي بتوفر أماكن متنوعة للتنزه، هتلاقي فيها مرتفعات شاهقة هتختبر قدرتك على التحمل وهتدفعك لمغامرة مميزة.

لإن جبل زغوان هو قومي، فلازم تطلع تصريح علشان تتنزه هناك، وتقدر تطلع التصريح ده عن طريق إيميل لمؤسسة جبل زغوان Speleo.club.zaghouan@gmail.com، وممكن تطلب منهم يظبطوك مع مجموعة لو رايح لوحدك.

أول ما توصل ولاية زغوان، تقدر تاخد تاكسي لمعبد المياه، ومن هناك تبدأ المعامرة على جبل زغوان. ومن الأفضل إنك تكون مع مجموعة وتاخدوا معاكم دليل محلي في الرحلة.

تنزه في الطبيعة
عن: journeyera

المتنزه بيقفل الساعة 4 مساءً، وعلشان كده من الأفضل إنك تبدأ النزهة بدري، وممكن تروح قبل الساعة 4 وتفضل هناك علشان تشوف غروب الشمس، ومافيش مشكلة إنك تنزل بعد ما المتنزه يقفل، بس بلاش تفضل لحد وقت متأخر من الليل، علشان المساحة هناك شاسعة ومافيهاش شبكة تليفون كويسة ولا إضاءة.

الطقس هناك لطيف معظم أيام السنة، لكن في فترة الشتاء الشديد من أواخر شهر 12 لبداية شهر فبراير، بيكون بارد جدًا. في الصيف بيكون الجو برد برضه عند القمة، فاتأكد إنك تلبس حاجة مناسبة وتاخد معاك مياه كفاية، وعمومًا لازم تاخد معاك جاكت سواء صيف أو شتاء، علشان الرياح الباردة عند القمة.

المغرب: سلسلة جبال ريف

جبال الريف هي سلسلة جبلية كبيرة موجودة في شمالي المملكة المغربية، واللي بتتمبز بالأمطار الغزيرة، وبالتالي بغطاء نباتي كثيف، خلاها منطقة مناسبة جدًا للرعي والزراعة وأنشطة قطع الأشجار.

أحسن طريقة تروح بها جبال ريف هي من خلال تاكسي من فاس أو طنجة، التاكسي هيوصلك لقرية أقشور، ودي تعتبر نقطة البداية لرحلتك. في القرية هتلاقي السكان المحليين لطاف جدًا ومستعدين يساعدوك في أي معلومات محتاجها لرحلتك، ورغم إنك ممكن تنطلق في الرحلة لوحدك، لكن بننصح إنك تاخد معاك دليل من السكان المحليين.

الرحلة عبر الجبل ممكن تكون صعبة شوية ومتعبة، فلازم تستعد للمجهود اللي هتبذله علشان توصل للغابات والشلالات الجميلة اللي هتشوفها على طول الطريق.

وعلشان ارتفاع الجبل كبير والأمطار فيه غزيرة، بننصح إنك تاخد معاك ملابس تقيلة وحاجة تحميك من المطر.

مش لازم تاخد معاك أي مأكولات أو مشروبات، لإن في أكشاك وكافيهات وفنادق كتير على طول الطريق، تقدر تشتري منها اللي أنت عايزه وبأسعار معقوله، فمش لازم تزود حمولتك بإضافات للأكل.

غالبًا مش بيكون في شبكة تليفون في الطريق، فممكن تفضل منعزل عن العالم طول فترة الرحلة، فجهز نفسك لكده كويس قبل ما تبدأ الرحلة. وماتخافش لو لقيت الطريق فاضي معظم الوقت، لإن مساحة الجبل الضخمة بتخلي نسبة التقاء الرحالة فيه قليلة.

مصر: محمية وادي دجلة

عن: aqarfeed

هي محمية موجودة في قلب القاهرة في شرقي حي المعادي، واللي تقدر توصلها بسهولة لو كنت موجود في القاهرة، ممكن تروح بعربيتك أو من خلال المواصلات اللي موجودة في موقف عرب المعادي.

المحمية بتضم أنواع مختلفة من الحيوانات والطيور والحشرات، ومنها الغزلان والسلاحف المصرية المعرضة للانقراض والطيور النادرة. وفيها مساحات شاسعة من الأراضي الصحراوية والجبال وتجمعات المياه الجميلة، اللي هتستمع بالمشي فيها.

عن: hyatok

تقدر تروح المحمية في أي وقت من السنة كل يوم من الساعة 7 الصبح للساعة 6 مساءً، وتقدر تخيم في المحمية وتبات لليوم التاني، وأسعار الدخول أقل من عشرة جنية للمشاة وحوالي 50 جنيه للسيارات.

درجات الحرارة في المحمية بتكون حارة صيفًا وباردة شتاءً، زيّ الظروف الطبيعية في القاهرة، وبالتالي مش هتحتاج تلبس لبس مختلف عن ملابس أهل العاصمة المصرية خلال الفصل اللي هتزور فيه المحمية، بس بننصح إنك تروح لابس بنطلون مش شورت، وجزمة برقبة، علشان بعض الزواحف اللي هناك ممكن تكون سامة.

لبنان: درب المسيلحة

الدرب هو عبارة عن طريق حجري مرصوف بين غابات منطقة المسيلحة، اللي بتتميز بأنواع مختلفة من الأشجار والنباتات، بالإضافة لينابيع المياه والبحيرات الصغيرة، وبيبدأ الدرب من قلعة المسيلحة وتدريجيًا بيطلع الجبل لحد ما يوصل لمدينة البترون.

ويُعتبر من أفضل أماكن التنزه أو التسلق لو بتحب المشي في الطبيعة. هتبدأ النزهة من القلعة اللي اتبنت في القرن الـ17 بهدف حراسة الطريق اللي بيربط بين طرابلس وبيروت.

تقدر توصل للقلعة الموجودة في محافظة طرابلس شمالي لبنان، عن طريق تاكسي من المدينة، وعند القلعة هتلاقي مكتب متخصص هيجاوبك على كل المعلومات اللي محتاجها عن القلعة، ومن خلال المشي على الطريق المرصوف بين الغابات، هتقدر تكمل مغامرتك من القلعة لمدينة البترون في سهولة وأمان، وأنت مستمتع بالطبيعة.

درب المسيلحة الواقع داخل المحمية الطبيعية لمنطقة المسيلحة مفتوح للزوار على مدار السنة من غير أي تكاليف، وبيتميز بطقس معتدل، فمش هتحتاج ملابس خاصة للتنزه هناك، ولكن اتأكد إنك تاخد ملابس مناسبة للفصل اللي هتتنزه فيه.

عمان: من وادي بن خالد لوادي طيوي

المسافة بين المنقطتين دول 28 كم، ممكن تاخد 18 ساعة مشي، وعلشان كده لازم تستعد لنزهة طويلة، ومش سهلة، بيمتد الطريق في جبال الحجر الموجودة شرقي عمان، وممكن تاخدها في يوم واحد من الصبح لآخر النهار، أو تخيم على قمة الجبل وتكمل تاني يوم.

هتقابل في طريقك وأنت طالع الجبل بحيرات صغيرة بلون الزمرد في وادي بني خالد، وهتشوف مناظر جميلة بتطل على الوادي ومزارع التمور.

وهتشوف منظر تحفة لغروب الشمس، لو قررت تخيم على قمة الجبل، وبعدها هتنزل من الجبل بين الممرات الصخيرة مع الحمير والنسور والماعز الجبلي، وهتوصل لوادي الطيوي، وهناك تقدر تنزل المياه في البرك الطبيعية قرب الشلالات.

ننصحك إنك تاخد دليل من السكان المحليين، يساعدك تستمع بالرحلة من غير ما تتعرض لمشاكل، وعلشان الطقس غالبًا بيكون معتدل طول أيام السنة، فشوف درجة الحرارة خلال الأيام اللي هتزور فيها المنطقة وإيه نوع الملابس اللي محتاجها، وماتقلقلش الطقس مش بيكون حر أوي ولا برد أوي عمومًا.

تقدر توصل لنقطة بداية الرحلة (وادي طيوي) في عربية من مسقط اللي تبعد عنه 160 كيلو متر، وعلى طول الطريق هتتبع الإشارات الموجودة على الطريق لحد ما توصل للوادي.

شوف أقرب مكان ليك وأبدأ مغامرتك الخاصة في الطبيعة، ولو تعرف مناطق تانية جربتها بنفسك في أي مكان في الوطن العربي، سيب لنا في التعليقات تجربتك الخاصة في المكان.

آخر كلمة: ماتفوتوش قراءة: مدينة البترا: ازاي خلق العرب واحة في قلب الصحراء وحموها من غير سلاح

تعليقات
Loading...
Tweet
Share
Share
Pin