في الأوقات الصعبة: إزاي تقدر تدعم الناس بأبسط الطرق؟

مفيش شك إن السنة دي كانت صعبة على الكل، سواء صحيًا أو ماديًا وحتى كمان نفسيًا.. وكمان مع اقتراب نهاية العام، فالكل بشكل عام بيبقى مضغوط يا بسبب الدراسة والامتحانات أو ضغط الشغل آخر السنة وغيره.. فزي ما بنتكلم عن أهمية إتباع الإجراءات الاحترازية حفاظًا على سلامة الصحة العامة، كان لازم كمان نتكلم عن أهمية الاعتناء “بالصحة النفسية” اللي متقلش أهمية أبدًا.. فلو الناس اللي حواليك مضغوطين وانت مش عارف تعملهم إيه، إحنا هنقولك على طرق بسيطة تقدر تحسس بيها غيرك بالدفىء والدعم النفسي خلال الأوقات الصعبة.

اسمعهم بشغف

لما يكون حد تعبان ومحتاج يفضفض، إنك تبين ليه إنك مهتم وتسمعله بشغف، ده هيفرق معاه جدًا حتى لو مقدمتلوش أي مساعدة.. لإن ساعات كل اللي بيكون محتاجه الشخص، إنه يلاقي حد يقدر يفتحله قلبه ويسمعه.

ماتقولش جملة “انت مكبر الموضوع”

إحنا عارفين إن نيتك حلوة، بس الجملة دي بتضايق أكتر ما بتهدي.. فلما يكون شخص تعبان من حاجة حتى لو مش كبيرة، بتبقى في نظره هو حاجة كبيرة، وإنك تتفه منها مش هيريحه في حاجة، فكر في جمل تانية.

ماتخليش الموضوع عنك انت

لما حد يكون عنده مشكلة، محدش بيحب يحس إنه في مسابقة “مين بائس أكتر” أنا ولا الطرف اللي بحكيله.. فلما الشخص اللي بيحكي يبدأ يسمع كلام زيّ “أومال أنا أعمل إيه” وحاجات زيّ دي، بيفقد الشخص اهتمامه بإنه يكمل كلام، وبيخرج من النقاش شايل الهم وكمان حاسس إن محدش حاسس بيه!

اشتريله حاجة بسيطة تبين إنك عارفه أوي

3 Easy Ways to Avoid Paying A Gift Tax - TaxAct Blog
عن:Taxat

في الأوقات الصعبة من أكتر الطرق اللي بتخلي الشخص مبسوط هو إنه يحس إن في وسط الدوشة والزحمة لسه في ناس فاكراه ومهتمة بالتفاصيل الصغيرة المتعلقة بيه.. فمثلًا لو الشخص بيحب نوع شوكلاتة معينة أو شخصية كرتونية مفضلة بالنسبة ليه، أو حتى كوباية قهوة.. لو روحت للشخص ده لبيته وإدتهاله، صدقني هتفرق معاه كتير!

كلمه عن إنجازاته السابقة

لما تيجي فترة صعبة، الواحد بيحس إنها بقت حاجة “أبدية” ومش هتنتهي أبدًا وللأسف بننسى كام مرة عدينا بظروف صعبة وحاجات بنفتكر إنها مش هتعدي، وفي الأخر كانت بتمر لدرجة إن إحنا بننسى إنها حصلت في يوم من الأيام. علشان كده، إنك تفكر حد بانتصارات صغيرة سابقة ليه، هتحسن من حالته المزاجية وهتديلوا الأمل واليقين إنه يقدر يعدي أي حاجة.

اخرجوا في مكان مفتوح الصبح

من الطرق اللي ممكن تستغربوها، ولكن مثبت علميًا إن ضوء الشمس والهواء بيساعد في تحسين الحالة النفسية.. فلو خدته وروحتوا تفطروا فطار بسيط كده الصبح في مطعم “outdoor” أو حتى في حديقة مفتوحة، واتكلمتوا في حاجات إيجابية بعيدة تمامًا عن الموضوع اللي مضايقه، الشمس والهوا والخروجة والكلام الإيجابي (ووجودك طبعًا) هيفرق معاه كتير وهيديله الطاقة علشان يقدر يكمل.

آخر كلمة: ماتفوتوش قراءة: “علامات هتساعدكم علشان تعرفوا إن أنتم في علاقة مؤذية.

تعليقات
Loading...
Tweet
Share
Share
Pin