متعودين إن الشتا يعني لبس غامق، من الأسود للرمادي، والبني والبيج بدرجاتهم، علشان القاعدة المعروفة بإن الصيف ألوانه فاتحة والشتا للغوامق، علشان الألوان الغامقة بتمتص أشعة الشمس فتساعدنا نحس بالدفا، عكس الألوان الفاتحة اللي بتعكس أشعة الشمس فمانحسش بيها، لكن بعيدًا عن كل ده، الموضة كل يوم في جديد، ودلوقتي بنشوف ألوان فاتحة ومختلفة مش متعودين نشوفها للبس الشتا، بأشكال وألوان حلوة أول ما شوفناها على بالطو مثلًا حصل لنا error في الأول، لكننا حسينا إن فعلًا ناقصنا إن اختيارات باليت ألوان لبس الشتا وشياكتها كانت محتاجة تبقى أكتر.
بالطو بألوان فاتحة
القطعة دي بالذات متعودين إنها تكون بألوان محددة وهما الأسود والرمادي أو البني والبيج. مهما لسبنا ألوان في الهدوم اللي تحتهم، لكن االثوابت إن البالطو يبقى بالألوان دي.
اللي خلّانا ناخد بالنا إن فعلًا في اتجاه جديد في موضة الشتا هو البالطو بألوان زاهية زي الأصفر والفوشيا واللبني الفاتح.
مصممين أزياء ابتدوا الموضة
مصممين الأزياء في الوطن العربي اتجهوا للموضة دي، وبقينا نشوف ألوان مختلفة للجواكت، وكمان الفنانين والمشاهير بيحبوا يجربوا الحاجات الجديدة في الموضة والأزياء، وبيلهمونا بستايلات جديدة، بنهتم نشوفها خصوصًا في موسم اللبس الشيك ده.
الديزاينر نور حمور كسرت التابو ده بدرجات البينك، وخلتنا نغير رأينا عن فكرة الألوان المحددة للجواكت اللي اتحبست في دماغنا عند الأسود والرمادي.
أفكار وتنسيق
البلوجرز والمشاهير كمان ورونا تنسيقات مختلفة للألوان دي في الشتا، بأكتر من ستايل وأكتر من طريقة. سواء بالطو أو كارديجان أو بلوفر، أفكار كتير تخلينا نستخدم اللبس اللي عندنا بألوان فاتحة في تنسيقات حلوة.
لو شايفين إن الشتا كئيب وألوانه باهتة أو غامقة وتقليدية، الموضة دلوقتي هتغير فكرتكم عنه. ولو مش بتحبوا الشتا وشايفينه مش لذيذ زي الصيف، جبنا لكم ألوان الصيف تحسسكم بنفس الأجواء بس بشياكة لبس الشتا ورونقه.