في عيد ميلاد سبيستون الـ 22، حبينا نحتفل معاكم بالقناة اللي ربت جيل كامل وبتمثل النهارده طفولته كلها والنوستالجيا بتاعته، وعلشان سبيستون عرضت مسلسلات كارتون كتير وكل واحد فينا عنده المسلسل المفضل بتاعه، سألنا الناس على السوشيال ميديا عن أكتر كارتون كانوا بيحبوه، ودي كانت إجاباتهم.
أنا وأخي
كارتون محمد (27 سنة) المفضل، وقال: “كنت بحبه أوي علشان كان مليان مشاعر كده، وأنا كنت طفل حساس، وعلشان علاقة الأخ بأخوه دي كانت حلوة أوي وعلشان كنت طفل وحيد وكان نفسي يبقى عندي أخ فكنت مرتبط بالكارتون ده أوي”.
بائعة الكبريت
كارتون إبراهيم (57 سنة) المفضل، وقال: “كنت بحبه أوي علشان كان مليان مشاعر دافية كده، ورغم إنه كان حزين أوي وبيعيطني كتير، لكن كنت بحبه أوي، يمكن علشان كنت بحب أعيط كتير، وجاتني أوقات كتير كنت ببقى مش عايز أشوف الكارتون ده علشان حزين أوي، بس برضه كنت برجع له تاني علشان أعرف بائعة الكبريت عامله إيه، وطبعًا كانت مش بتبقى عاملة كويس خالص كل مرة”.
المحقق كونان
كارتون نيرة (26 سنة) المفضل، وقالت إنها بتحبه أوي علشان: “كنت بحب التحقيقات وجرايم القتل والقصص البوليسية من وأنا صغيرة أوي، وعلشان كده كنت بحب كونان أوي، بالذات إن كان شكله عيل صغير زينا عادي، وبعد كده بقيت بحب أجاثا كريستي والروايات البوليسية أوي لما كبرت”.
الحديقة السرية
كارتون أحمد (26 سنة) المفضل، وقال: “كنت بحبه أوي علشان فكرة الهدف والغاية في إنها بتهتم بالحديقة علشان ترجعها جميلة تاني، وكنت ببقى متحمس أوي كل مرة إني أعرف الحديقة هيحصل فيها إيه. وكمان قصة حياة ماري كانت مثيرة أوي، ومليانة أسرار تخليك عايز تعرف أكتر”.
دروب ريمي
كارتون سارة (24 سنة) المفضل، وقالت: “الكارتون ده بيعيطني أوي، وكنت بحبه وأتفرج عليه على طول برضه، كنت بحب الرحلة الصعبة اللي ريمي عايشاها، وكنت بفضل متابعة الكارتون علشان نفسي ريمي تبقى كويسة. وكمان كنت بحب أغنية التتر أوي”.
المقاتل النبيل (أكيرا)
كارتون محمود (27 سنة) المفضل، وقال: “كنت بحب المقاتل النبيل أكيرا أوي، علشان كنت بنجذب أوي لمشاهد الضرب والأكشن والحاجات العنيفة دي، ومشاهد القتال وكده، وكمان كيرا كان طيب وحريف كونغ فو جامد، وكان مز أوي وفتى أحلامي ولسه بحبه لحد دلوقتي”.
أنا وأختي
كارتون نادين (25 سنة) المفضل، وقالت: “كنت بنت وحيدة وسط أخوات ولاد، وكنت بحب ألعب بلعب البيبيهات وإني أبقى أمهم وكده، وعلشان كده أنا وأختي وفر ليا كل الحاجات اللي بحبها؛ اتنين أخوات بنات فاهمين بعض وبيحبوا بعض، وفي واحدة بتهتم ببيبي صغنونة كيوت خالص، كان أكتر مسلسل بحبه، وكنت كمان بحب الأغنية اللي في الأول أوي”.
أدغال الديجيتال
كارتون فاطمة (27 سنة) المفضل، وقالت: “كنت بحبه أوي علشان أغنية التتر، وكمان علشان من وأنا صغير أوي وبحب الحاجات اللي فيها فانتازيا وخيال علمي ووحوش، والصراعات والمواجهات ما بين الخير والشر وقوى الظلام في مقابل الخير، وكمان فكرة إن الأبطال كانوا أطفال زينا كانت بتخليني أرتبط بمشاكلهم أكتر”.
إيه أكتر مسلسل كارتون كنت بتحبه على سبيستون وليه، سيب لنا ردك في الكومنتات.