العيد قرب، وخلاص لازم ننزل نشتري لبس العيد، بس الناس محتاجة توفر في الفلوس، علشان العالم كله بيمر بأزمة اقتصادية كبيرة، وبالتالي مش عايزين نروح نشتري من ماركة أجنبية وندفع مائة ألف جنيه في بنطلون جينز.
في المقال ده، هنتكلم عن سبع ماركات عربية للملابس، هتوفر لك في الفلوس وهتلاقي عندهم خيارات شيك ومناسبة للعيد.
ميرا عدنان
مصممة الأزياء الفلسطينية اللي عايشة في غزة، ميرا عدنان، بتقدم تصميمات جريئة ورقيقة في نفس الوقت، وبتستوحي تصميماتها من التراث الفلسطيني، وبتستدعي فيها روح ماضي غزة.
بتقدم ميرا من خلال المتجر بتاعها مجموعة واسعة من التصميمات اللي هتلاقي فيها ذوقك أيًا كان، وهتوفر لك ملابس شيك وفيها روح التراث الشرقي.
فانك دو كاير
بيستعد فانك دو كايرو دلوقتي لافتتاح الموقع الرسمي بتاعه، لكن المتجر على إنستجرام شغال بقى له شوية، والناس بتقول عنه كلام كويس جدًا.
بيقدم فانك دو كايرو تصميمات فانكي وكوول وجديدة، رجالي وحريمي، بخامات ممتازة وبأسعار متوسطة، المميز عندهم، عن تجربة شخصية، سرعة التوصيل والاستجابة السريعة لأي مشاكل ممكن تقابلك وأنت بتشتري.
يوسف دريسي
بيقول يوسف دريسي عن ماركة الملابس بتاعته إنها بتدفع الحدود، لإنها كل حاجة في نفس الوقت، وبالفعل بتوفر الماركة المغربية درجات مختلفة من الذوق، من الكلاسيكي للحديث، ومن الرجالي للحريمي.
بيعتمد دريسي في تصميماته على الألوان المبهجة، وبيحول الأنماط والخطوط علشان يطلع تناسقات تبان في الأول غريبة، لحد ما تشوف الجمال فيها.
إن يور شو
واحد من أهم ماركات الملابس العربية، واللي بيمزه عن أي ماركة تانية هو التصميمات المختلفة والجميلة والكتير اللي بيقدمها للعملاء بتوعه.
كمان خامات الملابس بتاعته ناعمة ومش بتبوظ مع الغسيل، وعن تجربة شخصية، الفريق اللي قايم على إن يور شو بيقدم خدمة ممتازة للعملاء.
هتلاقي عندهم لبس رجالي وحريمي ولبس للأطفال، وهتلاقي لبس للخروج وللبيت وللبحر، وشنط وجزم وكل حاجة ممكن تحتاجها علشان تعمل طقم تحفة.
رافية
في 2015، افتتحت مصممة الأزياء المصرية نورا جلال محل ملابس في منطقة الزمالك وسمته (رافية) وماكانتش تعرف إنه هيبقى واحد من أهم ماركات الملابس المصرية.
بيصمم ملابس رافية ويصنعها مجموعة من الستات المصريات اللي بيشتغلوا من البيوت، وبيقدموا ملابس مصصمة بشكل مخصوص للست المصرية.
روني حلو
الماركة اللبنانية (روني حلو) بتقدم تجربة شيك وفي نفس الوقت مستدامة، بتهتم بالوعي البيئي ومفهوم المواد اللي تعيش وقت طويل، علشان مايكونش استهلاكنا الكتير سبب في التأثير السلبي على البيئة.
بيستخدم روني نسيج وقطع ملابس بيجيبها من مصانع قديمة، وعنده هتلاقي كل حاجة ممكن تحتاجها، ملابس رجالي وحريمي، ولبس محجبات وغير محجبات، وهتشارك مع روني في قضية بيئية مهمة.
نور الظاهري
ماركة الأزياء السعودية اللي أسستها نور الظاهري من حوالي عشر سنين، بتقول عنها إنها كانت تحدي فرضه المجتمع عليها في تصميم ملابس محتشمة وشيك وجذابة في نفس الوقت، وبتأكد إنها قبلت التحدي ده وهي سعيدة، لإنها بتحب التحدي.
بحوالي 15 مجموعة أزياء في رصيد ماركة نور الظاهري، هتلاقي كل حاجة، وأكيد هتلاقي حاجة تناسبك وتناسب ذوقك في العيد.
وأنت يا عزيزي القارئ، إيه الماركات العربية اللي بتشتري منها ملابس؟ ولو عندك تجربة خاصة كويسة مع ماركة ملابس عربية، وناوي تشتري منها لبس العيد، قول لنا عليها في الكومنتات، واحكي لنا تجربتك معاها.