عبد الرحمن مجدي والتحرش بفتاة الفندق في أولمبياد طوكيو

خرج منتخب مصر لكرة القدم من أولمبياد طوكيو بعد الخسارة أمام البرازيل بهدف واحد مقابل لا شيء، ومع عودة المنتخب للقاهرة وصلت لنا أخبار عن فتح تحقيق مع لاعب الإسماعيلي ولاعب منتخب مصر في الأولمبياد عبد الرحمن مجدي بسبب فعل غير لائق في طوكيو.

تحقيق اتحاد الكرة المصري مع عبد الرحمن مجدي لسه مفتوح لحد دلوقتي، لكن اللي حصل في طوكيو قبل خسارة المنتخب المصري صفحة واتقفلت وجبنالكم القصة كاملة عن اللي حصل.

لاعب مصري تاني في قضية تحرش دولية

بدأت أزمة المنتخب المصري في طوكيو بعد مباراة مصر وإسبانيا واللي كانت أول مباراة للمنتخب في الأولمبياد، بعد المباراة رجعت اللاعيبة لأوضهم في الفندق وهناك دخلت واحدة من الـ Room service أوضة عبد الرحمن مجدي، وفي كام ثانية وجوا أوضة عبد الرحمن بدأت أزمة دولية سببت فضيحة جنسية جديدة للاعب مصري في بطولة عالمية مهمة.

حسب مصدر مقرب من البعثة، البنت خرجت من أوضة مجدي بعد حوالي 15 ثانية وعلى وشها ملامح قلق وتوتر وخرجت من الفندق على قسم الشرطة على طول.

في قسم الشرطة البنت عملت محضر للاعب المصري واتهمته فيه بالتحرش بيها. مجموعة من أفراد الأمن الياباني راحوا مع البنت لأوضة مجدي في الفندق واحتجزوه هو وشريكه في الأوضة عمار حمدي.

عمار حمدي خرج من الأزمة دي بعد ما البنت أكدت إنه ماكانش ليه أي دور في التحرش واتهمت مجدي بالتحرش والاعتداء عليها. مجدي أنكر التهمة وقال إنه حط إيده على كتفها واداها 250 جنيه مصري بقشيش علشان تنضف الأوضة، وإنه ماكانش قصده أي تحرش خالص وإنها فهمت الموضوع غلط.

حاولت إدارة البعثة المصرية احتواء الموقف بكل الطرق لكن ماقدرتش وفعلًا تم احتجاز اللاعب المصري من قبل الشرطة، والتحقيق معاه استمر لمدة خمس ساعات، وفي مصادر بتقول إنه ماخرجش من التحقيقات مع الشرطة اليابانية غير بعد سبع ساعات.

مصدر مقرب من البعثة المصرية: أزمة عبدالرحمن مجدي مع فتاة الفندق بدأت من أول يوم في اليابان

المصدر بيقول إن مجدي بدأ التحرش بالبنت من أول يوم باستخدام ألفاظ وتصرفات مخلة للأداب ولكن بسبب حاجز اللغة البنت ماكانتش فاهمة هو بيقول إيه أو إذا كان ده تحرش جنسي فعلًا ولا لأ.

وأكد المصدر اللي اتكلم مع صحف مختلفة في مصر إن مجدي “خرج عن النص” واستخدم ألفاظ وإيحاءات “غير لائقة” في أكتر من موقف مع البنت، واللي خلاها تضطر في الأخر إنها تقدم فيه شكوى في قسم الشرطة.

محاولات البعثة المصرية لاحتواء الموقف كانت فاشلة بكل الأشكال وكل اللي قدروا يعملوه إنهم يرجعوا مجدي القاهرة مع البعثة المصرية ويتجنبوا حبسه في اليابان.

حاولت البعثة المصرية تحتوي الموقف المخل لكن اللجنة الأولمبية والشرطة اليابانية والفيفا كانوا مصرين على حبس عبد الرحمن مجدي.

قررت البعثة المصرية استبعاد مجدي تمامًا من المنتخب الأولمبي وكتبوا اعتذار لإدارة الفندق وللجنة الأولمبية وللاتحاد الدولي لكرة القدم عن اللي حصل من مجدي وقدموه موقع من اللاعب المتهم في القضية المخلة دي.

وبعد رجوع البعثة للقاهرة تم إيقاف مجدي وفتح تحقيق معاه بخصوص الأزمة الكبيرة اللي حصلت في طوكيو، والتحقيق لسه مفتوح لحد اللحظة دي.

رد عبد الرحمن مجدي على قرار إيقافه وتحويله للتحقيق في مصر

كتب عبدالرحمن مجدى، من خلال صفحته على الإنستجرام:

غريب جدا التوقيت وغريب انتشار شائعات وأكاذيب لا أساس لها بهذا الشكل، أنا معملتش حاجة وردي مساء اليوم.

ومن المتوقع في حالة ثبوت الأدلة على مجدي في التحقيقات اللي شغالة في اللحظة دي إن يكون عقابه توقيفه عن اللعب لمدة موسم كامل، واستبعاده تمامًا من تمثيل أي درجة من درجات المنتخب المصري.

آخر كلمة: ماتفوتوش قراءة: بطل مصر في الأولمبياد وعضو البرلمان ومدرس مساعد في كلية الصيدلة: مين هي هادية حسني؟

تعليقات
Loading...
Tweet
Share
Share
Pin