تنويم مغناطيسي.. حيلة جديدة اكتشفتها السلطات الأمنية بالعراق بهدف السرقة، بعد ما اعتقلوا متهم محترف في إنه ينيم الناس ويسرق فلوسهم، ومش أي فلوس أخد 4 الاف دولار أميركي وقبلها 750 ألف دينار عراقي، ومن الواضح إن الموضوع ده منتشر في العراق بقاله فترة والناس بتتكلم عنه خصوصًا إنهم قبضوا على 3 متهمين سرقوا مبلغ من بنك بنفس الطريقة.. وللسبب ده فكرنا نكتب عن قصص غريبة ومضحكة سمعناها عن حوادث السرقة، قصص مش هتسمع عنها كتير بس الأكيد إنها أحلى من فعل السرقة نفسه.
الحرامي النائم
وده واحد قرر إنه يسرق بيت في الأقصر بس متأخر شوية، وهو شغال في التشطيب على الشقة تعب، ما هو أكيد طول النهار شغال لف على شقق، فحب ياخد قيلولة، بس الظاهر إنها طولت شوية لحد ما أصحاب الشقة جوم واتقبض عليه بتهمة السرقة، مع إني حاسة إنهم المفروض يقبضوا عليه بسبب النوم أثناء ساعات العمل الرسمية لإنه مالحقش يسرق حاجة.
الحرامي الطيب
تلاتة عاطلين مش لاقيين شغل قرروا يسرقوا توكتوك عن طريق إنهم يرموا شطة في وش صاحبه علشان يفقد السيطرة ومايبقاش شايف ويقعد يعطس، ولما سألوهم ليه “الشطة” قالوا احنا قعدنا نفكر ازاي نسرقه من غير ما نأذيه لإننا عارفين إن سواقيين التوكتوك غلابة واحنا بس كنا عايزين الفلوس علشان نسدد الديون اللي علينا.
أشهر حرامي وأجدع كادر تصوير
الحرامي اللي سرق موبايل صحفي اليوم السابع، وقتها كان تريند وأشهر حرامي في مصر، سرق الموبايل من الصحفي وكان طالع وقتها بث مباشر والحرامي ماخدش باله واتصور وهو راكب الموتوسيكل وهربان.
الكار ده مش كاري
كان عايز يسرق بنك وقرر إنه يدخل من فتحة التكييف في شقة فوق البنك، بس اتحبس داخل الفتحة وماقدرش يطلع منها وبدأ ينادي على الناس “الحقوني” لحد ما جوم انقذوه هما والشرطة.
أنا حرامي أه بس عندي ضمير
سرقوا تماثيل ومعادن غالية من المعبد، وبعد يومين ضميرهم وجعهم وسابوا رسالة قدام بيت كاهن المعبد إنهم ندموا وماقدروش لا ياكلوا ولا يشربوا من وقت السرقة ورجعوا كل اللي أخدوه تاني.
الإنذار يا فخري
3 حاولوا يسرقوا محل مجوهرات والمحلات دي معروفة بإنها لها نظام إنذار خاص، الست اللي كانت واقفة في المحل قدرت إنها تدوس على الإنذار اللي بيقفل الباب، واتحبسوا جوا المحل وعلشان يفتحو الباب كان لازم حد يدوس على الإنذار اللي في أخر المحل ويجري على الباب علشان يخرج لإن الباب بيقفل بعد ثانيتين، فقضوها واحد يدوس على الإنذار والتاني يخرج لحد أخر واحد مالقاش حد يدوس له على الزرار، ففضل هو رايح جاي يدوس ويجري علشان يلحق الباب قبل ما يقفل، بس للأسف مالحقش لحد ما قعد يخبط على الباب علشان حد يساعده من برا وواحد شافه بالصدفة افتكره محبوس ففتح له وخرجه.