لقطات مثيرة وأرقام قياسية ملفتة وأعلى تقييم بين المحللين والمتخصصين حصل عليها صلاح بعد ماتش ليفربول ويونايتد، اللي اتلعب على “أنفيلد” معقل الريدز، وخلص برباعية نظيفة لأصحاب الأرض. وده الماتش اللي كان مؤجل من الجولة التلاتين بين الفريقين في الدوري الإنجليزي.. الماتش شهد عودة محمد صلاح للتسجيل والتألق. وليفربول رفع رصيده ل ٧٦ نقطة احتل بيها صدارة ترتيب الدورس الإنجليزي بفارق نقطتين عن مانشستر سيتي.
صلاح عمل إيه في الماتش؟
سجل الجون التاني والرابع وصنع الأول، وهي الثنائية اللي رفعت رصيده ل٢٢ هدف، واتصدر بيها جدول الهدافين.
أرقام مميزة
شبكة Sky Sports قالت إن صلاح حصل على تقييم بلغ 8.8 /10، وأشارت إن استحواذه على الكورة كان بنسبة 3.2%، وبلغت نسبة تمريراته الصحيحة 83%.
كمان استحوذ على الكورة ٦ مرات، وشاط ٤ مرات؛ اتنين منها الجون وواحدة برا وواحدة تصدى ليها الدفاع.
أرقام قياسية
حقق صلاح أرقام قياسية في الماتش ده، وبقى أكتر لاعب سجل أهداف في قمة مانشستر يونايتد وليفربول في التاريخ، وده بالتساوي مع “ستيفن جيرارد” اللي سجل فيها ٩ أهداف.
وهو أول لاعب يسجل ٦ مرات قدام مانشستر يونايتد خلال موسم واحد بالدوري الإنجليزي، كمان نجح إنه يحافظ على صدارة هدافي الدوري الإنجليزي، زي ما قلنا قبل كده، ب٢٢ هدف وبفارق ٥ أهداف عن “سون هوينج مين” لاعب توتنهام، كمان تصدر قائمة صناعة الأهداف على المستوي الدوري الإنجليزي ب١٢ هدف.
تصريحات الانتصار
بعد الماتش وفي تصريحات لشبكة سكاي سبورتس، قال صلاح إن وسط اليونايتد سهل مهمتهم وكانوا بينجحوا في الفوز بالكورة في موقف واحد لواحد معاهم، وأضاف إن فريقه كان دايمًا بيسعى للأكتر في الماتش فبعد ما سجلوا الأول، بدأوا يسعوا علشان يسجلوا التاني والتالت.
صلاح كمان قال إنه دايما بيسجل كتير مع ليفربول وساعات بيبقى حظه سيء، ويمكن دي كانت إشارة للفترة اللي فاتت.
واتكلم عن ساديو مانيه وقال إنهم حافظين بعض كويس في الملعب، لإنهم لعبوا مع بعض لمدة أربع أو خمس سنين.
لقطة استثنائية لجماهير ليفربول مع كريستيانو رونالدو
الماتش شهد لقطة فريدة وهي وقوف جماهير ليفربول لدقيقة حداد على روح ابن رونالدو، اللي أتوفى بعد ولادته على طول، ووصفها مدرب ليفربول يورجن كلوب بإنها “لقطة المباراة”، وإن الجماهير أظهرت معدنها الأصيل.
