سكوب أمل: رهف من متلازمة داون لفاشونستا عندها 4 سنين

رهف هي متلازمة الحب والسعادة.. ده اللي قالته مروة عن بنتها رهف عبده اللي من أصحاب متلازمة داون، واللي حولت الإعاقة إلى طاقة وبقت فاشونستا من وهي عندها 4 سنين.. وحكت مروة إن في حمل رهف كان الوضع ماشي تمام لغاية ما وصلت للشهر التامن، والدكتور اكتشف إن في مشاكل والجنين مش واصله دم ولازم يعملوا ولادة مبكرة.

وبعد ما اتولدت، عانت من مشاكل صحية كتيرة، وعملت عمليات كتيرة، فكانت بتعاني من فتق في الحجاب الحاجز والمعدة، وبعد كده حصل ثقب في الرئة، ولكن بدعوات والدتها، رهف عدت كل العقبات دي، وقررت مروة وخدت وعد لنفسها إن حياة بنتها هتكون طاقة ومش إعاقة، فأهلها عملوا كل اللي في طاقتهم علشان ينقذوها، وده كان كل أملهم.


وده ماخلاش مروة تعامل بنتها بحساسية أو بخوف، بالعكس عاملتها كأي طفل ليه أحلام وأمال وطموحات، واكتشفت مع الوقت إن رهف بتحب التصوير جدًا، فبدأت تشارك صورها على السوشيال ميديا، وبالفعل حققت نجاح وبدأت تعرض أزياء لماركات مشهورة، كل ده وهي عندها ٤ سنين بس.


والقصة دي تعتبر درس للأهل ونظرتهم لأطفالهم اللي هي عامل كبير في تكوينهم كهيئة وشخصية وتفكير، فلو مش هتدي لطفلك ده، مين هيديه! ادعم طفلك وشوف هو بيحب إيه وخليك معاه ورا حلمه أو شغفه.


آخر كلمة: ماتفوتوش قراءة: الفنان التشكيلي رضا فضل وتحديه لمفاهيم المجتمع عن الاحتياجات الخاصة

تعليقات
Loading...
Tweet
Share
Share
Pin