ست خدع مفيدة لخسارة الوزن اللي زيدناه في الفترة اللي فاتت..

Fresh vegetables, fruits, and nuts on gray background

بواسطة منة حسني.

الكلام النهارده هيكون على إزاي ممكن نقلل من أكلنا و نحسن شويه من الكوارث اللي حصلت في السهر قدام التلفزيون في فترة الحجر. لو ماقدرناش نتبع نظام غذائي مناسب لطبيعة يومنا وجسمنا فإحنا ممكن نبتدي الطريق سوا بشوية خدع لإنقاذ ما يمكن إنقاذه وبطريقة غير مباشرة تساعد علي تقليل كمية السعرات اللي بتدخل جسمنا.

طبق أصغر

أول حاجة من الطرق اللي بتجبرنا ناكل أقل في كل وجبة من غير ما ناخد بالنا هي استخدامنا اطباق أصغر من المعتادة بتجبرنا بالتالي إجبار جميل أوي إننا نحط كمية أكل أقل من كل صنف.

طبق واحد

تاني خدعة إننا لو عندنا فرصة ناكل لوحدنا ممكن نستخدم طبق واحد بس لكل الاصناف اللي هناكلها وده بيخلينا مهما وزعنا اصناف في الطبق مش هيكون زي الكمية اللي داخله لما يكون لكل صنف طبق.

إبدأ بالصحي اللي هيشبعك

تالت حاجة هي تنظيم الاصناف اللي هناكلها، في عناصر مختلفة بنتحاجها في كل وجبة زيّ كاربوهيدرات وبروتينات ودهون وفيتامينات والياف ومعادن بمختلف مصادرهم. خلينا نبتدي بالشوربة عشان من غير ما ناخد بالنا بتملي المعدة و بعدها ندخل البروتينات و بعدهم الالياف و الفيتامينات و المعادن.. و اخيرُا نلجأ للدهون ثم الكاربوهيدرات. بكده بتكون بدأت بكل اللي هيحسسك بالشبع لحد ما توصل عند الدهون والكاربوهيدرات هتاكل منهم كميه أقل.

شوكة بدل المعلقة

الخدعة الرابعة إننا ممكن نستخدم شوكة في أكل الحبوب زي الرز والشوفان مثلُا لأن الشوكة بتساعدنا بشكل غير مباشر برضه على تناول كميه أقل من الأكل ده وكمان بتعتبر من العادات الشيك.

الألياف

ومن العادات البسيطه اللي بتحسسنا بالشبع لفترة أطول هي شُرب كمية من المياة قبل كل وجبة واعتمادنا علي الاياف بشكل اساسي في الوجبات اليوميه أو حتي ما بين الوجبات من العادات الذكية والمفيدة.

مصادر الألياف كتير وأشهرهم الخس والشوفان واللب الابيض الغير مملح والحبوب والمكسرات النية. كمية مناسبة من أي نوع من انواع الالياف ما بين الوجبات بيساعد علي الاحساس بالشبع لفتره اطول.

البدايل

سادس حاجة وأهمهم الحقيقة هي البدايل، بمعنى إن لو إنت شخص عنده ثوابت غذائية يومية وعارف إنها مش أصح حاجة فممكن تبتدي بالبدايل الصحية بتاعتها. على سبيل المثال لو إنت من الاشخاص اللي بتستخدم سكريات كتير فممكن تبدأ تبدل السكر العادي بالعسل أو بسكر استيفيا الصحي، لو من الاشخاص اللي بتستهلك النيسكافيه ممكن نبدله بالقهوة، لو من الاشخاص اللي بتستهلك يوميًا كمية كبيرة من المقليات ممكن نستخدم بدالها التحميص أو نستخدم زيت الزيتون أو الزبدة. حاول تبتدي حاجة حاجة عشان ماتتوهش.

أخر كلمة: هــااه؟ إيه أول حاجة اقنعتك فالنصايح دي. وإيه أول بديل صحي ناوي تلجأله و تشاركنا بيه؟

تعليقات
Loading...
Tweet
Share
Share
Pin