سبوتيفاي: ويجز أكتر فنان مسموع للسنة التانية على التوالي

زيّ ماحنا متعودين بقالنا تلات سنين، في منطقة الشرق الأوسط وشمال إفريقيا، سبوتيفاي بتحتفي باللي بيسمعه المصريين في السنة اللي عدت واللي عبرت عن “العادي السنه ديه” من أكتر أغنية اشتغلت، لأكتر فنان اتسمع لأنواع المزيكا اللي تم اختيارها. وسبوتيفاي أعلنت عن قايمة الفنانين والألبومات والأغاني وأنواع البودكاست اللي اتسمعوا أكتر حاجة واللي ابتكرها فنانين مبدعين، واللي اتسمعوا من أكتر من 381 مليون مستخدم حول العالم.

والسنة دي الهيب هوب مكتسح القايمة في مصر، فالنوع ده من الموسيقى تطور بشكل ملحوظ وناجح في الفترة الأخيرة في مصر، وأكتر مثال حي على الكلام ده هي أغنية كيفي كده للفنان الصاعد وحبيب الملايين ويجز مع ديسكو مصر. وبكده يكون الفنان ويجز بأسلوبه المميز والمحبوب، كسب لقب أكتر فنان مسموع في ملخص 2021، فأربعة من أغانيه كانوا ضمن أكتر عشر أغنيات اتسمعوا في مصر، وهم “أسياد الصوت” مع LZHYMR و”مش فير” و”عفاريت الأسفلت” و”هصلا“.

وعلق ويجز عن الخبر ده بكل سعادة وقال: “من أربع سنين، بدأت الكارير ده، وبدأت أعمل مزيكا تعبر عن مشاعري، بس اللي ماكنتش أعرفه إني بعبر عن مشاعر الملايين. أنا سعيد جدًا إني حصلت على لقب الفنان الأكثر استماعًا في مصر لتاني سنة على التوالي من Spotify، وتاني فنان عربي أكثر استماعاً في الشرق الأوسط وشمال أفريقيا. إحساس إن أكثر من أغنية ليا موجودة في قائمة الأغاني الأكثر استماعاً في مصر هو إحساس ما يتوصفش، كمان إننا نشوف إن الهيب هوب مسيطر على أنواع الموسيقى الأكثر استماعاً في مصر حاجة مشجعة جدًا. شكرًا لكل الفانز إنكم خليتوني الاختيار الأول عندكم.”

ويجز الفنان اللي متابعينه من أول ظهوره وشهدنا على نجاحه وتطوره خطوة بخطوة، ففاكرين أغاني زيّ “كده وكده” و”باظت خالص” اللي لسه بنسمعهم ومانسيناهمش مع الحاجات الجديدة الجامدة واللي بتسيطر على الترند، ده غير مشاركاته في أغاني الأفلام زيّ “الغسالة”، كمان شوفناه في إعلانات متنوعة، ده غير متابعته على صفحته على انستجرام مش محتاجين نتكلم عنها كتير، لإنه بيوزع مرح وسعادة من خلالها، فاللي متابعه هيفهم احنا بنتكلم في إيه. وشوفناه وهو بيعمل ماركة ملابس خدت عقلنا من ألوانها لتصاميمها لابتكارها واختلافها عن اللبس المعتاد.

مبسوطين لويجز إنه دايمًا في نجاح مستمر، وده لإنه ببساطة يستحقه، فالهيب هوب تحدي ونوع جديد من المزيكا على مصر والمجتمع العربي كله، لكنه قدر يبرز نفسه ويبين موهبته ويجمع محبين ومعجبين بالملايين، ومكملين يسمعوه على سبوتيفاي وفي كل حتة.

كمان شوفنا حاجات تانية عظيمة تصدرت القايمة من الهيب هوب زيّ ملوك السين لمروان موسى وألبومه فلوريدا، وغابة للكبير مروان بابلو اللي اعتزل الراب ولكنه رجع بقوة، وكمان أغنيته CTRL كانت أكتر أغنية مسموعة وقت موكب المومياوات وده دليل على تأثيره في الثقافة.

ونجوم البوب شوفناهم في القايمة برضه، مع الهضبة عمرو دياب وألبومه سهران، وحمزة نمرة وألبومه مولود سنة 80، ومحمد حماقي وألبومه يا فاتني.

سبوتيفاي كمان أطلق حملة تخلي المستخدم يبص على أكتر أغنية وأكتر ألبوم وأكتر فنان وأكتر نوع موسيقى سمعهم خلال السنة اللي فاتت وكمان عدد الدقايق اللي قعدت تسمع فيهم أغانيك. والسنة دي في ميزة وهي: 2021: الفيلم، هالتك الموسيقية، أوراق اللعب و ملخص 2021. وشايفين كل مستخدمين سبوتيفاي قاعدين يشاركوا تجربتهم على كل المنصات وكمان منصة TIKTOK اللي زادت السنة دي.

آخر كلمة: سبوتيفاي وويجز في نجاح مستمر ومش قادرين نبعد عنهم.

تعليقات
Loading...
Tweet
Share
Share
Pin