سبع أفلام مصرية في مهرجان الأفلام العربية بالسويد وسويسرا

الأعمال الفنية والأفلام المصرية في تطور باين للكُل، وفي الفترة الأخيرة أفلام مصرية كتير جدًا اتعرضت في مهرجانات عالمية واترشحت كمان لجوايز كبيرة، ودلوقتي تم الإعلان عن سبع أفلام من مصر هيتعرضوا في مهرجانات عالمية، اتنين منهم في مهرجان ستوكهولم للفيلم العربي في السويد، وخمسة في مهرجان زيورخ للفيلم العربي بسويسرا.. فتعالوا نتعرف على الأفلام دي.

طلق صناعي

طلق صناعي هو واحد من الفيلمين اللي هيتعرضوا في مهرجان ستوكهولم، وهو فيلم مصري كوميدي من بطولة ماجد الكدواني وحورية فرغلي، ومن إخراج خالد دياب. وقصة الفيلم عن راجل ومراته الحامل عايزين يأخدوا تأشيرة السفر لأمريكا، ولكن السفارة بترفض، فبيقرر الزوج إنه يدي مراته حبوب علشان تسرع عملية الولادة فتولد في السفارة، ويأخد المولود الجنسية الأمريكية لإنه بيعتبر اتولد على أرض أمريكية.

فوتوكوبي

فوتوكوبي هو الفيلم التاني اللي هيتعرض في مهرجان ستوكهولم، وهو فيلم دراما مصري من بطولة محمود حميدة وشيرين رضا، ومن إخراج تامر عشري، والفيلم بيتكلم عن رجل سنه في آخر الخمسينات عايش لوحده، وساكن في عبده باشا، وعنده محل تصوير الورق، ومع تطور الأحداث بيتعلق بجارته اللي هي كمان عايشة لوحدها، والفيلم كسب نجمة الجونة الدهبية لأحسن فيلم عربي في مهرجان الجونة السينمائي في دورته الأولى سنة 2017.

تراب الماس

فيلم تراب الماس هو واحد من الأفلام الخمسة اللي هتتعرض في مهرجان سويسرا، وهو فيلم غامض ومن بطولة آسر ياسين، وعزت العلايلي، ومنة شلبي، وماجد الكدواني، ومن إخراج مروان حامد، ومقتبس من رواية أحمد مراد. القصة بتحكي عن طه، وهو شاب عايش مع والده، وبيشتغل في شركة للأدوية مندوب دعاية طبية، وبتحصل جريمة قتل غامضة بتقلب حياته.

مدينة وفن السعادة الضائع

هو فيلم من الأفلام اللي هتتعرض في مهرجان سويسرا، وهو فيلم وثائقي من إخراج ندى إبراهيم، وبيدور حولين مدينة القاهرة وناسها وقصصهم من الطبقات الاجتماعية المختلفة.

السيد بنفسجي

هو فيلم رسوم متحركة مصري قصير، من إخراج أسامة أبو زيد، وإنتاج المركز القومي للسينما، وتأليف أحمد عبد الرحيم.. وقصته بتدور حوالين حرية الاختيار، والتنوع، والاختلاف اللي بيعتبروا شيء أساسي في حياة أي حد، والفيلم تم اختياره كممثل رسمي لمصر في مهرجان “جولدن كوكر” اللي بيركز على أفلام الرسوم المتحركة في بلغاريا في شهر سبتمبر.

حبيب

هو فيلم دراما قصير، من بطولة سيد رجب وسلوى محمد علي، وإخراج وتأليف شادي فؤاد، وقصة الفيلم بتدور حوالين حبيب اللي بيشتغل حلاق في محله الخاص، وهو بيعاني نفسيًا، لكن عنده إصرار على الحياة، وفي يوم بيكسر الروتين بتاعه وبيروح مغامرة علشان يسعد مراته.

الدائرة السوداء

عن: iaffz

هو فيلم رسوم متحركة قصير من إخراج عادل البدراوي، وبيتكلم عن الزعماء الدينيين، والقادة العسكريين، والقوة، ومصير الناس الأسود.

آخر كلمة: ماتفوتوش قراءة: اختيارنا لمجموعة من الأفلام العربية اللي قدرت توصل لمهرجانات عالمية في 2020.

تعليقات
Loading...
Tweet
Share
Share
Pin