رحلة “الشعر الكيرلي” من التنمر للموضة

موضة دلوقتي ناس كتير بتسعى ليها، حتى لو نوع شعرهم نفسه أو شكله وطبيعته مش كيرلي.. بنشوف دلوقتي احتفاء بطبيعة الشعر الكيرلي وقد إيه شكله مميز وجميل، لكن النقطة دي وصلنا ليها بعد رحلة طويلة، كانت بدايتها فيها عدم تقبل وتنمر ومحاولات تغيير طبيعة، لكن قدامها كان في محاولات كتير الناس قامت بيها لتقبل شكلنا أيًا كان اختلافه، ونشر فكرة إن مافيش حاجة اسمها معيار معين هو ده اللي لازم الناس كلها تتقاس عليه. احنا أكيد مبسوطين باللي وصلنا له دلوقتي، لكن عايزين نتكلم عن الحكاية من أولها.

عن: balsam

عدم التقبل

لو شعرك كيرلي، أكيد وأنتي صغيرة لسه، قابلتي اللي قالك “شعرك منكوش كده ليه” .. “أنتي ضاربة شعرك في الخلاط” واللي تقول لمامتك “أنتي مش بتسرحيلها شعرها ليه” لحد طنط اللي بتتحشر بحلول ووصفات طبيعية -من وجهة نظرها- ممكن تبوظ شعرنا أساسًا، وتقترح زيت رجل النملة اللي هيفرد شعرك ويخليه حرير، على اعتبار إن شكل شعرك دلوقتي كارثة مايتسكتش عليها، وماينفعش نسيبك كده.

ده غير التنمر اللي أكيد قابلتيه في مرحلة ما في حياتك، والتريقة والسف وخفة الدم اللي بنشوفها من ناس كتير، خصوصًا في المدرسة، وللأسف وقتها كنا صغيرين وماعندناش الإدراك الكافي اللي يخلينا نتقبل شكلنا زي ما هو وندافع عن ده، أو إننا نقول وجهة نظرنا في تقبل شكلنا وشعرنا وإن أي كلام بيتقال تحت بند “الهزار” على شكلنا مش مقبول.

نقطة تحوّل

مع محاولات كتير لتغيير النقطة السلبية دي، وإن كفاية نضطر نستخدم حاجات بتضر شعرنا علشان بس نبقى على معايير الجمال الوهمية؛ سواء نعرض شعرنا للحرارة بشكل مستمر ويتعرض للضرر ويبوظ، أو نستخدم مواد مختلفة علشان نغير من طبيعته، أخيرًا وصلنا لمرحلة إن الناس تتقبل شكلك وأنتي بشعرك الكيرلي في الشارع عادي، ده كمان بقى موضة، وحتى الناس اللي شعرها طبيعته مش كيرلي، بقوا يبذلوا مجهود في إنهم يعملوا الستايل ده.

دلوقتي حتى الأمهات بقى عندهم وعي أكتر، وبيحببوا الأطفال في طبيعة شعرهم، وبيسألوا ويتعلموا ويعرفوا ازاي يقدروا يتعاملوا مع الشعر الكيرلي ويخلوه صحي، ويعلموا ولادهم وبناتهم يحبوا شعرهم، ويعرفوا ازاي يردوا على أي حد يضايقهم أو يتكلم بطريقة وحشة عن شكلهم.

كمان دلوقتي بنشوف عروسة يوم فرحها بشعرها الكيرلي عادي من غير ما تفرده، ومش بنستغرب، بالعكس الناس بيرحبوا بالاختلاف ده.

عن: fustany

مواقف مختلفة

كمان من المواقف اللي أتحكت لينا من واحدة أصحابنا إن والدتها كانت متعودة تروح للكوافير باستمرار وتعمل شعرها، لكن بعد انتشار فيروس كورونا والخوف اللي كنا كلنا فيه، أولادها أقنعوها إنها تسيب شعرها على طبيعته وتنتهز فرصة إن مفيش كوافير، وفعلًا حبت شعرها الكيرلي وخلاص أتعودت عليه لحد دلوقتي.

عن: yahoo

ومن المواقف اللي أتقالت لنا: “مرة وأنا صغيرة، كنت مع أهلي في محطة القطر، وأتنين بصولي وضحكوا، وبعدها قالولي عاملاه في الخلاط ده ولا إيه.. من ساعتها كرهت شعري، بس بعد كده أبتديت أدور على منتجات تخلي شعري شكله صحي أكتر، بس مع المحافظة على طبيعته الكيرلي.. وفي مرة لما قصيته، الناس كانت بتستغرب في الأول لكن بعد شوية بقوا يسألوني بتعمليه ازاي وبتستخدمي منتجات إيه.. لدرجة إن في حد في الشارع وقفني علشان يسألني شعرك ده حقيقي؟”

“أهلي أصلهم من الصعيد، لما كنا بنروح زيارات هناك، كانوا بيتريقوا على شعري الكيرلي ويقولوا “إيه ده مين مكهربك”.. بس لما روحنا نزورهم تاني بعدها بسنة، لقيت معظم قرايبنا عاملين شعرهم زيي، أخويا، في محاولة للدفاع عمي، قال لهم “إيه مين مكهربكم دلوقتي”.

سوبر هيرو شعرها كيرلي

وفي مسلسل عالمي من إنتاج مارفل، شوفنا في “Moon Knight” بطلة خارقة شعرها كيرلي، وحكى المخرج محمد دياب القصة ورا فكرة إن السوبر هيرو المصرية تكون شعرها كيرلي:

حرق .. spoiler.
المفاجأه إللي قولت عليها في الحلقه الاخيره:

بنتي من و عندها اربع سنين و هي عاوزه تفرد شعرها، عشان عمرها…

Posted by Mohamed Diab on Wednesday, May 4, 2022

curly studios في كل مكان

دلوقتي كمان بقى فيه أماكن كتير للعناية بالشعر الكيرلي، سواء بالـ styling المناسب لطبيعة الشعر، أو المنتجات اللي تخليه صحي وشكله أحلى، أو كمان طريقة قص الشعر الكيرلي نفسها، غير قص الشعر الـ straight.

أخر كلمة: ماتفوتوش قراءة: قص الشعر والحالة النفسية: هل الموضوع أكبر من قصة شعر جديدة؟

تعليقات
Loading...
Tweet
Share
Share
Pin