خناقات ومواقف عبثية أول يوم رمضان

لحظات عبثية وخناقات بتشتعل بدون أي سابق إنذار في أول يوم رمضان، والأمور بتتصاعد أحيانًا ولحد دلوقتي مش عارفين نوصل لسبب حقيقي علمي يقولنا ده بيحصل ليه وازاي، بس اجتمعوا على حقيقة واحدة هي وجود الخناقات باختلافها.

فقرة صباح الخير

من أول ما نبدأ اليوم بتبدأ طاقة مع كلمة صباح الخير، اللي هو “وكمان بتقول صباح الخير” وفي الغالب بين الست الأصيلة وجوزها وبتبقى بسبب أنه نسي يتفق على الكنافة والقطايف أو تجاهل طلبها المتكرر في كيس سكر علشان البسبوسة، أو إنه عمل غلطة عمره وقرر مايروحش يفطر عند مامتها أول يوم.

فقرة المطبخ

نيجي بقى لفقرة المطبخ واللي بتبقى في الأيام العادية مشعللة من غير حاجة، وفي أول يوم رمضان بتزيد أضعاف أضعافها، ممنوع الاقتراب أو التصوير علشان الخلطة السرية للأكل ماتبوظش، ولو دخلت بدون استئذان استحمل العواقب.

خناقات البومب والصواريخ

ودي بتقى بين فئة رجال المعاش والأطفال في الشارع، بتفضل من أول اليوم لآخره مطاردات بينهم، والأطفال بتبقى فرحانة بنفسها كإنها بتعمل عمل بطولي، عندهم طاقة شر رهيبة مش عارفين جايبنها منين.

لحظات عبثية قبل الفطار

اللي فات كوم واللي جاي كوم تاني، كل ده كان على الهادي لكن الساعة اللي قبل الفطار، بيرتفع فيها معدل ضربات القلب بشكل مبالغ فيه، ويبدأ أي حد شايل من التاني يطلعها في حاجات تانية زي ” هنشرب خشاف ولا بلح” “مين هيعمل السلطة؟” “المفرش ده معوج ليه اعدله”، ودي بتبقى غلطتنا علشان ماقسمناش المهام من وقت السحور، وطبعًا فقرة “ما أنت نايملي طول النهار”، وفئة تانية ممكن تتخانق مع أي حد ماشي في الشارع وبعد ما يشتم كل الشتائم اللي في نفسه يقولك “متخلنيش أفطر عليك.. اللهم إني صائم”

للحديث بقية

بعد ما فطرنا وحلينا نبدأ فقرة مين هيلم السفرة؟ مين هيغسل المواعين؟ مين اللي هيبقى معاه الريموت، وأنك تمتلك الريموت في رمضان دي بتبقى محتاجة حرب علشان تتقرج على اللي أنت عايزه، وخناقات تانية زي ” ماقولتش رأيك في الأكل”.

آخر كلمة: ماتفوتوش قراءة: احترس من كلمة “كل سنة وأنت طيب” بها سم قاتل