الخط الساخن لنجدة الطفل بيلعب دور مهم جدًا في حماية الأطفال من كل أشكال العنف والإساءة اللي ممكن يتعرضوا ليها سواء جوا البيت أو برا، الخط مخصص لاستقبال البلاغات وإبلاغها للجهات المختصة علشان تتعامل مع البلاغات دي بجدية واهتمام، بعد ما يتأكدوا من صحتها وعلى أساسها بياخدوا الإجراءات المناسبة، وبيصنفوها يا إما بلاغات “اجتماعية” أو “جنائية”.
في الفترة الأخيرة قدر الخط الساخن التابع للمجلس القومي للطفولة والأمومة في منع ٢٧ حالة جواز أطفال في محافظات مختلفة واللي تم منعها بالتعاون مع النيابة والعامة ووزارة الداخلية، ده غير حملات التوعية بمخاطر وأضرار جواز الأطفال وإقناع العائلات اللي بتوقع إقرارات إنهم ميجوزوش ولادهم قبل بلوغ السن القانونية، وتفاصيل تانية كتير وأسئلة طرحناها في حوارنا في”سكوب إمباير” مع صبري عثمان، مدير خط نجدة الطفل في المجلس القومي للطفولة والأمومة.
حجم ظاهرة جواز الأطفال في مصر
أستاذ صبري عثمان قال إن القانون المصري بيبص لكل اللي أقل من ١٨ سنة على إنهم أطفال، وجواز الأطفال في سن أقل من ده بالنسبة للمجلس القومي للطفولة والأمومة جريمة، وأضاف إن البنات اللي في السن ده بيتعرضوا لظاهرة العنف أكتر من غيرهم من أزواجهم، ده غير إن المجلس مش ممكن يقبل فكرة إن شخص بالغ يتجوز طفلة بأي حال من الأحوال، وبيعتبرها اغتصاب لطفلة متملكش إرادتها.
وأضاف في حواره معانا إن البنات دول بيفقدوا حقهم في إكمال التعليم، وبيأثر على حياتهم الاجتماعية بالسلب وصحتها الإنجابية، وأكد إن المجلس بيقوم بالتوعية بخطر الظاهرة دي بمساعدة منظمات المجتمع المدني ووزارة الأوقاف والأزهر.
طرق حل ظاهرة العنف ضد الاطفال والجواز المبكر
مدير خط نجدة الأطفال أكد لنا في الحوار إن المجلس بيمشي في مسارات متعددة لحل الأزمة دي: هي القانون والتوعية مع بعض، وضرب مثل بظاهرة ختان الإناث بعد تغليظ عقوبته في القانون بسبب رفض بعض الأسر أو المجتمعات لحملات التوعية.
نفس الموضوع دلوقتي في ظاهرة جواز الأطفال اللي بيعيبها إن ماكانش في نص قانون واضح لتجريمه، إلا إن الرئيس عبدالفتاح السيسي أدى توجيهات لمشروع قانون بيجرم جواز الأطفال هيتم الموافقة عليه وإقراره قريب؛ لإن للأسف المادة الوحيدة الموجودة اللي بتجرم جواز الأطفال هو توثيقه قانونًا، وده بيتم التحايل عليه بالجواز العرفي وبتبقى المشكلة كده أكبر.
عدد بلاغات العنف ضد الأطفال في مصر
وصلت عدد البلاغات العنف ضد الأطفال في الفترة الأخيرة من ٢٠٢٠ – ٢٠٢١ لأكتر من ١٤ ألف بلاغ، منهم ٦٨١ بلاغ زواج أطفال تم التعامل مع أغلبهم بنجاح وإنقاذ الطفلة، وأضاف إن في أنواع من الجواز ده بتخش في القانون على إنه إتجار بالبشر، وساعات المجلس بيثبتها قدام النيابة زيّ الجواز السياحي أو الموسمي.
أستاذ عاطف قال إن المجلس بيركز على القرى أو المناطق اللي معروفة بعمالة الأطفال والعنف، وبيتم رصد فيها حالات كتيرة وبيتم التعامل معاها.
ازاي نتعامل مع خط نجدة الطفل بفاعلية؟
البلاغات اللي بتتقدم فيها سرية زيّ ما أكد لنا مديره، وبيقوم الشخص اللي بيبلغ بشرح حالة العنف واسم الطفل أو الطفلة وازاي نوصلهم، وأشار إن ساعات في بلاغات كتيرة بتيجي من جيران على حالات عنف أو ختان ضد أطفال، ومش بيبقوا عارفين اسم الطفل، فبيطلب منه بس يقول العنوان بشكل تفصيلي.
خط نجدة الطفل هو 16000 أو عن طريق واتس آب ٠١١٠٢١٢١٦٠٠