7 حاجات نفسنا الناس تبطل تعملها في رمضان

رمضان بدأ، وكل الناس سعيدة بدخول الشهر الكريم، ورمضان شهر مميز جدًا في الثقافة المصرية وله عادات وتقاليد مصرية كتير بتميزه عندنا عن أي دولة تانية في العالم، علشان المصريين بيحتفلوا به بطريقتهم الخاصة كل يوم من أيام الشهر الفضيل.

لكن للأسف، في عادات مصرية بتيجي مع شهر رمضان، ورغم إنها منتشرة جدًا، مؤذية ولازم نبطلها، وكتير من الحاجات دي مرتبطة بعادات الأكل عند المصريين في رمضان. يلا نشوف إيه الحاجات اللي ماينفعش نعملها في رمضان؟

اللهم إني صائم زائد شتيمة أو عصبية

شهر رمضان
عن: ain

الناس في نهار رمضان بتكون منقطعة عن الأكل والشرب بالكامل، وعلشان في ناس كتير بتكون متعودة على النيكوتين والكافيين ومعتمدين عليه بشكل كبير، الصيام بيكون صعب عليهم، وبيوترهم ويخلي العصبية تبان في تصرفاتهم بسهولة، ودول غالبًا الناس اللي بيتعصبوا بزيادة في نهار رمضان، وبيزعقوا كتير وممكن يشتموا ويقولوا “اللهم إني صائم”.

رمضان شهر كريم، وشهر عبادة، والإنسان المفروض يكون بيعود نفسه فيه على الروحانيات والسلام الداخلي، ونشر السلام ما بين الناس، لكن العصبية الكتير اللي بتظهر في نهار رمضان بتقول العكس تمامًا، وعلشان كده لازم ناخد بالنا إننا نتحكم في تصرفاتنا واحنا صايمين، ومش معنى إننا قولنا “اللهم إني صائم” يبقى كده تمام عادي نتعصب على الناس ونشتمهم ونزعق لهم.

الأكل الكتير

عن: cnn

الأكل في رمضان هو واحد من أهم مظاهر الشهر الكريم، والناس بتحتفل بالشهر بأكلات وحلويات مختلفة بتتعمل مخصوص في رمضان، بس للأسف الناس بتنسى إنه شهر صيام، والمفروض نقلل فيه الأكل علشان نحس بالناس الفقراء اللي مش قادرين ياكلوا طول السنة.

وبيتحول رمضان لأكتر شهر الناس بتاكل فيه، على عكس الهدف منه خالص، والأكل الكتير ده بيسبب مشاكل سمنة للناس، وبيعملهم مشاكل صحية كتير، بالذات إن الناس بتنسى نفسها في رمضان وبتاكل كل حاجة حتى لو كانت مضرة لصحتهم، وعلشان كده لازم نراجع نفسنا ونفتكر إنه شهر صيام، مش شهر أكل.

التبذير المبالغ فيه

شهر رمضان
عن: bbci

احنا بنصرف فلوس كتير جدًا في رمضان، وبالذات على الأكل وياميش رمضان، واللبس والحلويات والفوانيس والمكسرات، وكل دي حاجات متجذرة في ثقافتنا كمصريين في شهر رمضان، بس الحقيقة إنها بتعمل علينا ضغط مادي كبير. وفي الآخِر، بيتحول الشهر الكريم من شهر روحانيات وعبادة لشهر ضغط مادي فظيع، بيتعب الناس فيه وبيشتغلوا طول الوقت لدرجة إنهم بينسوا يستمتعوا بالشهر الفضيل.

الأكل الكتير اللي بيترمي

طبعًا علشان رمضان هو شهر الصيام، وعلشان الناس بتاكل فيه أكتر من أي وقت تاني في السنة، هتلاقي الناس بتيجي في الفطار والسحور ويعملوا كميات أكل كبيرة جدًا، وللأسف مش كل الأكل ده بيتاكل، لإننا غالبًا في الفطار مش بنقدر ناكل كتير؛ وبالتالي في جزء كبير من الأكل بيترمي.

وده طبعًا حرام، لإننا عكسنا الآية وبقينا بدل ما نصوم ونحس بالفقراء ونعطف عليهم، بقينا بنعمل أكل كتير ونرميه، في حين إن في ناس مش لاقية الأكل ده أصلًا.

احنا لازم نعيد حسابتنا في موضوع أكل رمضان ده، ونقلل الكميات اللي بتترمي أو نشتغل على طريقة مانرميش بها الأكل، وممكن نخرجه صدقة للناس اللي محتاجاه.

تضييع وقت طويل في الفرجة على التلفزيون

شهر رمضان
عن: bbci

زمان كان رمضان ده عبارة عن مسلسلين تلاتة على القناة التانية وبرنامج رمضاني وخلاص على كده، لكن دلوقتي بقى عندنا مئات القنوات الفضائية ومنصات المشاهدة المدفوعة، وبقت دراما رمضان كتير جدًا، لدرجة إنك مش بتلاحق تتفرج على إيه ولا إيه.

بس رمضان شهر عبادة، وجزء من العبادة كمان هو صلة الرحم، يعني نزور قرايبنا، ونخرج مع أهلنا وصحابنا، علشان نستمتع بأجواء رمضان وسط الناس اللي بنحبهم؛ وعلشان كده لازم نقلل الوقت اللي بنضيعه على التلفزيون ونستغله في التواصل الاجتماعي والعبادة.

تجاهل صحتنا والتغذية السليمة

الناس في رمضان بتاكل كتير أوي، وبتتجاهل صحتها، زي مرضى السكري اللي بياكلوا كميات حلويات كبيرة جدًا، ومرضى تاني كتير بياكلوا حاجات غلط عليهم، لمجرد إن الشهر كله بقى متمحور حوالين الأكل وبيحسوا إنهم بيفوتهم رمضان لو ما أكلوش كل حاجة موجودة.

غير كده، في ناس بتصوم عِند رغم إن ربنا إداهم رخصة يفطروا، سواء بسبب مرض معين أو حمل، أو دواء ضروري ياخدوه، الناس دي بتؤذي نفسها جدًا لما بتصوم، وده حرام.

مضايقة الناس اللي مش صايمة

عن: dw

صايم ولا زي كل سنة؟ بجد أسخف حاجة بتتقال في رمضان كل سنة، وبتعاير الناس اللي مش بتصوم، وبتحسسهم بالقلق كده، زيّ ما يكون الناس بقت رقيب على بعض، وبيتجاهلوا إن في ناس عندها رخصة تفطر، وإن دي حاجة شخصية مش لازم الإنسان يناقشها مع أي حد تاني لو هو مش عايز.

وعلشان كده، لازم نبطل نتدخل في الحاجات دي ونسيب اللي مش صايم من غير تحقيق وأسئلة واستفسارات ملهاش لازمة خالص.

في النهاية؛ لو في عادات مصرية تانية بتضايقك في رمضان قول لنا عنها في الكومنتات، وقول لنا بتضايقك ليه ازاي الناس تقدر تتخلص منها.

آخر كلمة: ماتفوتوش قراءة: لأضرار مختلفة: 8 مأكولات ماينفعش نخزنها في التلاجة

تعليقات
Loading...
Tweet
Share
Share
Pin