حاجات مش عايزين نكررها السنة دي.. التنمر على الفنانين في مهرجان الجونة

على مدار السنين اللي فاتت في دورات مهرجان الجونة السينمائي، اللي بعتبر أكبر حدث سينمائي بيلفت الأنظار لمصر حاليًا، شوفنا عروض كتير مختلفة لأغمال فنية، وشوفنا إطلالات مختلفة وجميلة لفنانين مصريين وعرب وكمان أجانب، وبستمتع بكل الأجواء دي وبنستناها كل سنة، لكن في وسط كل ده للأسف بنلاقي انتقادات صعبة وتنمر على الفنانين وكمان زوجاتهم، سواء تنمر على إطلالاتهم أو حتي تصرفاتهم، لدرجة إن التنمر وصل على شكلهم.

دينا الشربيني

كتير انتقدوا الفنانة دينا الشربيني في إطلالتها في مهرجان الجونة في دورته التانية في 2018، ووصلت التعليقات كمان لإنهم ينتقدوها لارتباطها بالفنان عمرو دياب، بتعليقات سخيفة لكن دينا مكانتش بتلتفت للتعليقات دي.

مي الغيطي وميار الغيطي

واللي تم التنمر عليهم بعد انتشار فيديو ليهم خلال لقاء تليفزيوني في المهرجان، بيوصفوا فيه أفلامهم المفضلة، وتم التعليق على الفيديو والتنمر على طريقة كلامهم ونطقهم اللي ظهرت في الفيديو، وفضل الفيديو فترة مادة للسخرية.

كنزي عبدالله

زوجة الفنان آسر ياسين، وتم توجيه انتقادات ليها بعد ظهورها معاه في مهرجان الجونة في أول دوراته، بإنها أكبر سنًا من آسر، ووصلت بشاعة التعليقات لإنها توصفها بإنها مش جميلة أو إن آسر أجمل منها، لكن آسر ظهر في أكتر من لقاء بيحكي عنها ويتغزل فيها ويحكي قصة حبهم.

أحمد حلمي ومنى زكي

اتوجه لأحمد حلمي انتقادات وتعليقات سلبية كتير وهجوم على صورة نزلها لزوجته منى زكي في مهرجان الجونة، وكتب على الصورة إنه فخور بيها وبيدعم نجاحها، لكن تعليقات سلبية كتيرة اتوجهت لثنائي القوة من غير سبب.

أحمد الفيشاوي وزوجته

كان أول ظهور لأحمد الفيشاوي بصحبة زوجته في مهرجان الجونة في دورته التانية، واتوجهلهم انتقادات و تنمر بشكل مش طبيعي، والتنمر كان على إطلالة ندى الكامل زوجة الفيشاوي، وكمان على إظهارهم لحبهم لبعض قدام الكاميرات على السجادة الحمراء، واتهموا الفيشاوي إنه بيقصد إثارة الجدل دايمًا وخطف الأضواء.

رانيا يوسف

ظهرت الفنانة رانيا يوسف في مهرجان الجونة في دورته الأخيره في 2019، بفستان وصفه البعض بإنه غير لائق، و تنمر عليها ناس كتير وقتها والموضوع أخد وقت كبير بقت فيه رانيا يوسف تريند على السوشيال ميديا بسبب الإطلالة دي.

آخر كلمة: بنتمني إختفاء ظاهرة التنمر من المجتمع المصري كله

تعليقات
Loading...
Tweet
Share
Share
Pin