حاجات بنشوفها عادية بس لازم ناخد لها موافقة قبل الإقدام عليها مع الآخرين

Mobile

الفترة دي شهدت طفرة في مناقشة أهمية الـ consent أو أخد موافقة من الطرف التاني في موضوع العلاقات، سواء في حالة الارتباط والزواج. ومع أهمية النوع ده من الموافقات، لازم كمان نتكلم عن أنواع تانية منها بتضمن حاجات كتيرة وبتشمل ناس تانية غير الأشخاص المرتبطين. في حاجات كتير في يومنا العادي ممكن نكون بنعملها مع الناس اللي حولينا بحسن نية، ولكنها بتكون تعدي وضغط على حرية الأشخاص في بعض الأوقات، فلازم نبدأ ناخد بالنا منها.

المناقشات الشخصية

لما بنلاقي مثلًا شخص متضايق أو قاعد لوحده، كتير بحسن نية بنروح للشخص نسأله بإصرار عن اللي مضايقه ونقطع عليه خلوته بنفسه. في بعض الناس مش بيحبوا يشاركوا ناس تانية معلومات خاصة عن حياتهم ولا يخترقوا خصوصيتهم لما يكونوا مفضلين العزلة. علشان كده أسئلة زيّ “ممكن أقعد معاك” أو “حابب تحكيلي إيه اللي حصل” هتكون أسئلة بسيطة تقدر تستشف منها إذا كان الشخص مستعد للنوع ده من الـ personal discussions وحابب يشاركك أفكاره ولا لأ.

السلام بالأحضان

عن: CTV

في ناس بطبيعتها بتكون friendly ولما بتقابل أشخاص جديدة أو تتعرف على زمايل في الشغل، بتلاقي نفسها بتسلم بالأحضان والبوس بطريقة عفوية، ولكن مش كل الناس بتكون مرتاحة.. علشان كده ممكن تتأكد عادي بابتسامة وسؤال لطيف “أحضن عادي ولا؟”

نشر معلومة عادية عن شخص تاني

عن: CDN

لما شخص يتكلم معاك في حاجة خاصة عنه بينك وبينه، حتى لو كانت في مواضيع عادية، ماينفعش نـ assume أو نتوقع إن الكلام اللي اتقال في القاعدة عادي إنه يتم تناقله مع ناس تانية. مهما كنت شايف إن الكلام عادي ومفيهوش سرية، مش هياخد من وقتك دقيقتين لو سألت الشخص “عادي إني أحكي عن الموضوع ده؟”.

تصوير صحابك أو زمايلك

في ناس بتحب تصور وتـ document أي لحظة حلوة أو موقف مضحك بيمروا بيه في يومهم، فبيطلعوا الموبايل ويصوروا صحابهم أو زمايلهم في الدراسة أو الشغل. لكن في كمان ناس تانية ممكن تكون مابتحبش التصوير لإحساسها إن ده بيخترق الخصوصية أو حتى مش مستريحة في الوقت الحالي إنها تتصور.. والحل السحري للمشكلة دي إجابته سهلة أوي، هو ببساطة سؤال اللي حوليك “ممكن أصوركم؟”

استلاف المقتنيات

مهما كانت علاقتك قوية مع صحابك أو أخواتك، لازم دايمًا تاخد إذن وموافقة استعارة أي حاجة سواء لبس أو غيرها من الحاجات، لإن في ناس بتحب الخصوصية ومش بتكون مرتاحة إنها تسلف متعلقاتها الشخصية مع حد تاني.

عزومة أشخاص غرباء في خروجة أو البيت

عن: Chicago

لو أنت مشارك السكن مع أحد الأصدقاء وعايز تعزم أصحاب غير مشتركين في البيت، من حق الشخص التاني المشترك معاك في السكن إنه يكون على علم بده ويتسأل لو هو موافق، وحتى في حالة إنها خروجة عادية، لازم كمان تتأكد بالسؤال لو الشخص هيكون مرتاح في وجود أفراد تانيين.

قدرة الشخص على الاستماع لمشاكل أو موضوع مهم

عن: WT

ساعات لما بيكون في موضوع شاغل بالنا ومأرقنا، بنلجأ لأصدقائنا أو الناس المقربين علشان نفضفض معاهم ونطلب منهم المساعدة المعنوية. لكن ظروف الناس بتختلف من وقت للتاني، وممكن يكون الشخص اللي قدامنا ماعندوش الطاقة الكافية إنه يسمع مشاكل أو يناقش مواضيع كبيرة، علشان كده المفروض قبل ما نخوض في الموضوع نسأل الأول “قادر تسمع دلوقتي؟”.

آخر كلمة: لازم مبدأ أخد الموافقة في الحياة اليومية يكون موجود في حياتنا بشكل أكبر…

تعليقات
Loading...
Tweet
Share
Share
Pin