جوجل يحتفل بذكرى ميلاد نور الشريف على طريقته الخاصة بعرض أدواره

اتعودنا على جوجل كل فترة إنه يحتفل بالمناسبات اللي بتتعلق بالرموز المؤثرة سواء الفنية أو الرياضية، وعلى أساس ده قرر جوجل الاحتفال بذكرى ميلاد نور الشريف على طريقته والموافق النهاردة الثلاثاء 28 أبريل. وعلى سيرة النجم نور الشريف، تعالوا نفتكر مع بعض أهم أعماله الدرامية اللي قدمها في شهر رمضان على الشاشة.

لن أعيش في جلباب أبي

عبد الغفور البرعي وفاطمة كشري شخصيات فضلت عايشة معانا، ولسه لحد دلوقتي لما يتعرض بيعمل تريند على السوشيال ميديا، وخصوصًا فرح سنية ومشهد البوفيه، مسلسل مر عليه أكثر من 20 سنة ولسه كأنه معروض لأول مرة. أكبر ميزة كانت في المسلسل ده هى تجسيد صورة وحالة الأسرة المصرية بكل تفاصيلها بدون أي تكلف حتى في لغة الحوار.

حضرة المتهم أبي

من إنتاج 2006، مسلسل تربوي من الدرجة الأولى اتكلم عن الصراع بين الطبقات في المجتمع وبين الأجيال المختلفة، تتر أغنية المسلسل كان من أعظم ما يكون من كلمات أحمد فؤاد نجم وصوت مدحت صالح وبنسمعها لحد دلوقتي، مشهد نهاية المسلسل ده اللي كان في المحكمة لخص حالنا دلوقتي وبعدين اتكلم عن السبب الرئيسي في إن الأجيال بتتطلع مشوهة وغير سوية، مشهد يتكتب فيه كتب، وأداء تمثيلي من نور الشريف يتاخد عليه جايزة أوسكار.

عائلة الحاج متولي

عن: al-arrab

تلاتة على واحد إيه؟ يادوب

وأربعه على واحد؟ حراام

اتعرض في 2001 في شهر رمضان على 12 محطة عربية، ناقش مشكلة تعدد الزوجات في شكل اجتماعي كوميدي، أدى وقتها نور الشريف دور تاجر القماش ابن البلد واللي عينه على الستات ببراعة وخفة على طريقة السهل الممتنع، المسلسل وقتها تقريبًا مصر كلها اتكلمت عليه وعمل صدى في وسائل الإعلام كبير.

عمر بن عبد العزيز

«الأعمار بيد الله وأتمنى يوم ما أموت يذيعوا المشهد ده».

جملة قالها نور الشريف في آخر أيامه في إحدى المقابلات التلفيزيونية لما كان بيتكلم عن مسلسل “عمر بن عبد العزيز”، وكان قصده وقتها على مشهد موت سيدنا عمر وإنه مهما درس وخد خبرة بعدها بس بييجي عند المشهد ده واحساسه بيبقى مختلف، عاش خلال المشهد ده لحظة ربانية ماتتنسيش، لحظة لما سيدنا عمر شاف قبل وفاته الصحابة اللي سبقوه وهو فرحان إنه رايحلهم، قال نور الشريف عن المشهد ده إنه أعظم مشهد عمله في حياته.

متخافوش

يعتبر من أجرأ المسلسلات اللي عملها نور الشريف، وتناول فيها قضايا شائكة زيّ فكرة الوطن والمواطنة وفلسطين بشكل أساسي، مسلسل حقق نجاح كبير وجدل كبير كمان لإنه اتصنف كمسلسل سياسي من الدرجة الأولى.

آخر كلمة: ماتفوتوش قراءة: معانا رغم وفاتها.. رجاء الجداوي بتطل علينا من جديد بأعمال فنية

تعليقات
Loading...
Tweet
Share
Share
Pin