على مدار تاريخ السينما، في نجمات سابوا بصمتهم من خلال الفن اللي قدموه، في أدوارهم وفي الأداء التمثيلي، وبجانب ده كان لهم ذوق خاص ومميز في الموضة والأزياء، وعملوا ستايل يميزهم، وأضاف لأدوارهم وفضل مكمل، ولحد دلوقتي بيستعينوا به أشهر خبراء الموضة والبنات والستات كمان، لحد ما بقوا أشهر أيقونات الموضة في تاريخ السينما.
هند رستم
مارلين مونرو الشرق كان لها طابعها الخاص في اختيار الأزياء، كانت بتختار دايمًا اللي يليق عليها، كل إطلالاتها كانت كلاسيكية بامتياز، بشهادة خبراء الموضة، كانت دايمًا بتفضل الفساتين اللي قصاتها بتميل لـ (pencil dress) أو قصة (mermaid) أو بالعربي (ديل السمكة)، اللي بتبرز قوام الجسم ورشاقته، الموضة دي ظهرت بقوة في فترة الخمسينيات، ولحد دلوقتي مابطلتش. وكانت بتفضل اللون الأسود في معظم فساتينها، لإنه كان بيليق دايمًا مع شعرها الأصفر مع تسريحة شعر الريترو القصيرة، أو تسريحة الشعر المرفوعة مع القُصة على الجبين.
محمد كمال خبير الموضة والأزياء ومصمم الأزياء حنا توما، أشادوا باختيارتها اللي لايقة عليها، فساتينها ومجوهراتها اللي كانت بتجمعها من كل حتة في العالم اتحولت لمتحف، ومنصات عروض الأزياء العالمية في الفترة الأخيرة شهدت رجوع الموديلات، اللي كان من ضمنها موديلات هند رستم، وبقت ضمن أبرز صيحات الموضة اللي اختارتها الفنانات ومشاهير هوليوود وبيظهروا بها في المهرجانات العالمية.
سعاد حسني
سندريلا الشاشة كانت وما زالت أيقونة من أيقونات الموضة في جيل الستينيات والسبعينيات، وصورها كانت وسيلة لترويج كتير من مكملات الموضة، ماكانتش بتثبت على نمط واحد أو استايل معين، كانت أول حد يلبس البدلة الكلاسيك في فيلم (أميرة حبي أنا) وأول حد يلبس البنطلون الضيق مع إنه ماكانش بيحظى بشعبية وقتها، ولكن قدرت إنها تخليه ملفت للنظر، وغيرت في مفهوم الموضة، وبعدها انتشر بين ستات مصر، وماحدش يقدر ينسى فستانها الأحمر الشهير المنقط بالأبيض والقبعة الشهيرة، واللي لسه لحد دلوقتي موضة، والفستان الـ (one shoulder) اللي كانت سابقة عصرها به، بعد ما اتصدر أغلب بيوت الأزياء العالمية.
الكاريه القصير كان التسريحة الأبرز لها، واللي كان لايق على ملامح وشها البسيط وبتعتبر أول الستات اللي استخدمت (الآي لاينر) بين نجمات جليها بشكل واضح لتوسيع عيونها الصغيرة.
خبير الأزياء مصطفى الشافعي، بيقول إن من الفساتين اللي لبستها أيقونة الموضة على مر تاريخها الفني، نقدر نستوحي منها لموضة السنة دي لإنها مابطلتش زيّ استايل الغجرية أو الـ (بوهو ستايل).
فاتن حمامة
الرقة والبساطة وعدم التكلف، كانوا عنوان اختيارات سيدة الشاشة العربية، كان لها ذوق رفيع شبه ذوق الأميرات، جمع ما بين الأنوثة والأناقة، اتألقت بأحدث تصميمات الموضة، سواء من خلال فساتين طويلة أو قصيرة منقوشة أو مجسمة بتستعرض جمالها ووزنها المثالي من غير مبالغة، واتنوعت ما بين الكاجوال والكلاسيك والأزياء الرياضية، وكانت بتفضل قماش الكاروهات والقصات المنقوشة والميدي الناعمة، واللي ممكن تتلبس في النهار أو المناسبات، ومكياجها كان بيتسم بالهدوء.
بساطة أزيائها واهتمامها بالتفاصيل أيًا كان الدور اللي كانت بتعمله، حتى لو كانت بتمثل دور بنت بسيطة، زيّ فيلم سيدة القصر، ادت بسببها دروس إن الأناقة مالهاش علاقة بغلو القطع، أو إنها من دور أزياء عالمية، لكن حسن الاختيار هو الأساس، ومن أشهر فساتينها فستان فيلم (لا أنام)، اللي اتقارن بعد كده بفستان الملكة كيت ميدلتون.
رجاء الجداوي
ملكة الشياكة بلا منازع، قدرت طول حياتها إنها تخطف الأنظار بأناقتها ورقيها في اختيار الإطلالات اللي بتتناسب مع كل مرحلة عمرية مرت بها، وده ماكانش غريب عليها كونها عاشت رحلة مع الموضة وعالم الأزياء استمرت 24 سنة، من خلال مشاركتها أول مرة 1961 كأول عارضة أزياء مصرية في وسط الجاليات الأجنبية، واتعاملت مع أشهر مصممين الأزياء في العالم ومن بينهم كوكو شانيل.
فضلت أيقونة للأزياء حتى في آخر أيامها، نهى حمدي، منسقة الأزياء، اتكلمت عن استايلاها، بتقول إنها اهتمت بالـ “تاييرات” والجيب واللي كانت في الغالب من خامة الكريب، وفضلت الأزياء المحتشمة، ومع مرور السنين كانت بتعتمد البدلة كاملة، أو جيب وجاكيت مع قميص من الحرير والستان مطرز بالكريستال والأحجار المميزة.
صباح
تاريخها حافل بفساتين وألوان وبجواهر وأكسسوارات تميزت بها إطلالاتها التلفزيونية وحفلاتها وأفلامها ومسرحياتها، جمعت بين الإطلالات المسرحية المبهرجة وبين الأناقة الكلاسيكية، المصمم اللبناني وليم الخوري رافقها لأكتر من 40 سنة، صمم لها أكتر من 360 فستان واتعرض 55 منهم في معرض دبي الدولي للمقتنيات القديمة، باعتبارها من أهم الأيقونات التراثية، وبعض القطع اتعمل منها متحف علشان يؤرخ مرحلة تاريخية كانت مختلفة في الفن والأزياء.
من أشهر فساتينها، فستان الفراشة اللي ظهرت به في شارع الحب، اللي اتحول لأيقونة فى عالم الموضة، ومرة شاركت عرض أزياء المصممة اللبنانية ايلا زحلان، في 2008، وكانت المجموعة كلها مستوحاة منها ومن فساتينها.