كرة القدم النسائية موجودة من سنين طويلة، واللي المفترض إنه شيء طبيعي لإن الكورة أو أي رياضة عمومًا مش مقتصرة على حد أو جنس معين، ولكن للأسف لإن “الستات” موجودة في الموضوع، يبقى لازم بعض الناس يقحموا التحرش بأي طريقة.. إمبارح منتخب السيدات المصري لكرة القدم فازوا في ماتش كان ضد فريق الكرة المنتخب اللبناني، وبدل ما نحتفل بمنتخبنا اللي فاز، زيّ ما بيحصل مع فريق الكرة الرجالي، للأسف ردود الأفعال كانت في اتجاه تاني خالص بعيد عن الاحتفال.
فانتشر كومنتات كتيرة جدًا كل محتواها تحرش لفظي باللاعبات في الفريق أو في حالات تانية تنمر وعنصرية، زيّ مثلًا “انتوا مكانكوا المطبخ” والباقي كان كومنتات أقل ما يقال عليها إنها خارجة وتخلينا بجد نحزن إن لسه في عقليات بالشكل ده في مصر، بعد كل التوعية اللي بنحاول نعملها لمكافحة التحرش ونشر الوعي والدفاع باستماتة عن حقوق المرأة.. ولكن بالرغم من كده، ده أكبر مثال إن التحرش مالوش أي علاقة بلبس البنت، ولكن بعقلية وأخلاق المتحرش.
وده كمان خلى البنات على السوشيال ميديا يتكلموا عن إزاي بالوقت الموضوع بيسوء مش بيتحسن، لإن في صور لفريق كرة نسائي من الستينات، واللي كان لبسهم مش مختلف عن النهارده، ولكن ماكناش بنشوف كم التحرش اللي بيحصل.. وده يبينلنا قد إيه بعض الشباب بقوا بجد خطر على البنات في الشارع المصري، لإنهم مستعدين بسبب وبدون سبب إنهم يتهجموا على أي ست وبكافة أنواع التحرش سواء لفظي أو جسدي، بسبب وبدون سبب.