من بداية التاريخ، والفن ليه تأثير كبير على سلوكيات وأفكار الأفراد والمجتمعات، وده لأن الفنون بمختلف أنواعها بتعتبر محرك مهم وفعال لوجدان الشعوب، وتقدر إنها تساهم في نشر الوعي، وتحقيق التغيير المطلوب لخلق مجتمع واعي مؤمن بحقوق وحريات كل أفراده.
ولدور الفنون في حياتنا، وتأثير السوشيال ميديا علينا كلنا، بدأت طالبة الفنون الجميلة، ساندرا منير، تحدي الرسم الخاص بيها بهاشتاج Egyptian_artists_empower_women#، ودعت كل الفنانين إنهم يشاركوها بأعمالهم اللي بتعبر عن مظاهر حياة المرأة المصرية بشكل إيجابي، بحيث يساهموا في نشر الوعي بدورها في المجتمع وحقوقها، ويمكنوها في نفس الوقت اللي هيغيروا فيه نظرة المجتمع النمطية ليها.
استلهمت ساندرا فكرة تحديها من تجربة فنية حصلت في أواخر القرن الـ 18 لما الفنانين بدأوا يرسموا المرأة وهي بتمارس حياتها العادية وقت المدرسة التعبيرية، والتجربة دي، بالإضافة للتجارب اللي سابقة ليها، قدرت إنها تغير نظرة المجتمع للمرأة وقتها.
التحدي شاف مشاركات متنوعة من فنانين وفنانات شباب قدروا يعبروا بفنهم عن شخصيات حقيقية قدرت تحقق أحلامها، وتواجه كل الصعوبات بمنتهى القوة والجرأة زي سارة عصام أول مصرية وعربية تلعب في الدوري الإنجليزي الممتاز للسيدات، والأسطى أسماء مجاهد اللي بتشتغل في مجال تجديد الأثاث والتنجيد.
وبالإضافة للرسومات المستوحاة من حياة بعض الشخصيات الملهمة، مشاركات الفنانين شملت بردو لوحات تعبيرية بتمثل المرأة المصرية بشكل عام وأنشطتها اليومية، ودي مجموعة من الأعمال الفنية المُشاركة في التحدي:
