في شهر رمضان الكريم خصوصًا، بنشوف إعلانات كتير لجمعيات خيرية ومؤسسات ومستشفيات، علشان تصرف زكاتك وصدقاتك للتبرعات ليهم بأوجه مختلفة، سواء كانت مساعدة فقراء، توصيل المياه لأماكن نائية، مساعدة الغارمات، أو مستشفيات بتساعد في العلاج بالمجان، أوجه كتير محتاجة الصدقات والتبرعات اللي الناس بتركز عليه بشكل أكبر في رمضان، لكن فيه كتير جدًا من المؤسسات والمستشفيات اللي حتى مش عندهم إمكانية أو ميزانية تخليهم يعملوا إعلانات علشان نعرفهم، ومحتاجين لكل دعم وتبرع علشان يقدروا يكملوا.
قررنا نلقي الضوء على جزء ولو بسيط من مؤسسات كتير محتاجين الدعم بكل أشكاله علشان يقدروا يكملوا، وعلشان لو نفسك تساعد بس مش عارف إيه هما علشان للأسف منسيين، هنقولك على قائمة بيهم.
مؤسسة مرسال
مؤسسة خيرية بتساعد مرضى بمختلف حالاتهم وكمان بتوفر أماكن للرعاية، وفيها دار ضيافة كمان للمغتربين من أهالي المرضى، شوفنا دور مرسال بالذات وقت أزمة كورونا ومن بدايتها، كانوا بيساعدوا في توفير أماكن في المستشفيات وكمان أنابيب الأكسجين للمرضى في كل مكان، وخدماتهم بيتم تقديمها في أشكال مختلفة كتير منهم تقديم الرعاية الصحية للمرضى بالمجان، والتكفل بأسر محتاجة وتخصيص دخل شهري لهم، والتكفل بأدوية علاج شهري للمحتاجين.
ده غير التبرعات بزكاة وصدقة في أوجه مختلفة تقدر تحددها وأنت بتتبرع.
تقدر تتبرع لأي فئة فيهم زيّ ما تحب، وممكن تعرف أكتر من خلال صفحتهم على الفيسبوك.
مستشفى أبو الريش
من اكتر المستشفيات اللي محتاجة للدعم والتبرعات، وفيها نقص في المستلزمات، وده بيهدد حياة الأطفال المرضى، وشوفنا من فترة الفنانة منة شلبي كتبت تويت وبتنشر عنهم، ويمكن دي كانت بداية لناس كتير إنها تعرف عن المستشفى، وعلشان كده دلوقتي بنلفت الأنظار ليها.
تقظر تتبرع بمستلزمات طبية أو حتى تتبرع بالدم للأطفال اللي محتاجين لكل مساعدة منك.
المعهد القومي للأورام
المعهد القومي للأورام القديم في القصر العيني، محتاج كل جهد للتبرع والمساعدة، حياة مرضى السرطان مهددة على وجود الأدوية والمستلزمات اللي فيها نقص شديد هناك، حتى إن أهالي المرضى بيكونوا في انتظار علاج ذويهم قدام المعهد لإن مفيش ليهم مكان، تقدر ببساطة حتى تساعدهم بأكل أو شرب يقويهم في وقفتهم لانتظار العلاج. وتقدر تتبرع علشان تنقذ حياة المرضى سواء هتتبرع بفلوس أو مستلزمات طبية.
مستشفى الحسين الجامعي
الموجودة في منطقة كرداسة، من أقدم وأكبر المستشفيات في مصر، وفيها أقسام كتير ومختلفة للعلاج، محتاجة الدعم والتبرعات ويمكن ناس كتير ماتعرفش ده وماتسمعش عن المستشفى لكنها بتقدم العلاج لكل المحتاجين، ومحتاجة الدعم والتبرعات علشان تقدر تكمل في تقديم خدماتها للناس
مستشفى حميات العباسية
خصوصًا في ظروف فيروس كورونا اللي بنواجهه من أكتر من سنة، والمستشفى تعتبر شايلة حمل كبير في الوباء ده ومحتاجة الدعم والتبرعات باستمرار علشان نساعد ناس أكتر تتغلب على الوباء ده، ده غير مجهودهم في الأيام العادية من قبل كورونا، اللي دلوقتي بقى مضاعف.
وغير كورونا، المستشفى بيتحول لها مرضى من كل مكان محتاجين للعلاج فيها. تقدر تزور المستشفى بنفسك في العباسية وتتبرع.
مستشفى أحمد ماهر التعليمي
من المستشفيات اللي محتاجة الدعم والتبرع لأوجه كتير زيّ نقص الأجهزة والمعدات والمستلزمات الطبية وغيرها. وتعتبر واحدة من أقدم المستشفيات الجامعية المعروفة للناس وبيلجأوا لها في مرضهم. تقدر تكون سند لهم وتمد المستشفى بالمساعدات والتبرعات.
في النهاية، هدفنا من المقال إننا نشارك أماكن مختلفة محتاجة للتبرعات والمساعدات ممكن تكون ماسمعتش عنها قبل كده، وطبعًا لك حق التحقق من كل جهة قبل ما تقرر تتبرع لها وتتأكد فلوسك هتروح فيم ولمين. بس في شهر الخير حبينا نشارك وندعم مؤسسات مش بتعتمد على الإعلانات اللي بنشوفها في التليفزيون طول الوقت.