بعد نجاحات كتير: ممثلين يستحقوا يبقوا على الرادار بتاعنا في 2022

نظرية وجود نجوم صف أول ونجوم صف تاني بدأت تختفي مؤخرًا. التصنيف دلوقتي مابقاش بس بياخد في عين الاعتبار الممثلين الأكتر شهرة أو اللي بيقدروا يشيلوا أفلام لوحدهم. بقى في اعتبارات تانية عند الجمهور أهم زيّ الحضور والأداء المتميز اللي ممكن ياخد الممثل في حتة تانية خالص بصرف النظر عن سنه أو ترتيب اسمه على التيترات.

في كمان ممثلين بيكونوا فعلًا نجوم كبار، مش بس لتاريخهم الطويل في الفن لكن كمان لحفاظهم على مستوى الأعمال اللي هما بيقدموه، والتطور في الشخصيات اللي بيقدموها على مر السنين، واللي بيها بيثبتوا لنا إنهم فعلًا يستحقوا اللقب والجماهيرية اللي عندهم. فتعالوا نشوف مين من الفنانين سواء من الأجيال الجديدة أو الأقدم، اللي يستحقوا يفضلوا على الرادار بتاعنا كمشاهدين في سنة 2022.

مايان السيد

مايان من الفنانات اللي ظهروا مؤخرًا على الساحة الفنية، لكن كان عندهم من الحضور والموهبة ما يكفي إنها تسيب بصمة كبيرة وتعمل بعض الأدوار زيّ دورها في حكاية “حلم حياتي” وشخصية نور في مسلسل حرب أهلية وغيرها من الأدوار اللي أشاد بيها الجمهور.

كريم محمود عبد العزيز

كريم من الفنانين اللي قدرنا نشوف نضوجه الفني على مر السنين، من أول دوره في فيلم الناظر وهو شاب في الإعدادية، لحد دوره مؤخرًا في فيلم موسى اللي حصل على ردود أفعال إيجابية كتير. وكريم بشكل خاص، جاله تعليقات كتير عن دوره في الفيلم وقد إيه أدائه كان مميز وصادق.

لقاء الخميسي

ممكن نكون مابنشوفش لقاء الخميسي في أعمال كل سنة، ولكن بمجرد ما بتظهر في عمل بنفتكر قد إيه عندها موهبة جبارة. في مسلسل رمضان اللي فات ضد الكسر، شوفنا لقاء في دور وأداء أكتر من رائع، وكانت من أكتر الفنانات تأثيرًا على المشاهدين في موسم رمضان 2021.

تارا عماد

بما إننا جيبنا سيرة مسلسل ضد الكسر، كان لازم نذكر تارا عماد. تارا من الشابات اللي قدر يكون ليها حضور وكاريزما خاصة على الشاشة من بداية ظهورها. بتحرص دايمًا على اختيار شخصيات مختلفة عن بعض ومُركبة، بتخليك مش عارف تكرها ولا تتعاطف معاها!

نادين نسيب نجيم

أكيد مش محتاجين نتكلم عن نجاحات الفنانة اللبنانية نادين نجيم لإنها فعلًا ما تتعدش! من الفنانات القليلين اللي تقريبًا كل وأي عمل بتقدمه لازم يعمل ضجة ونجاح رهيب. من مسلسل لو وتشيلو ويوم ونص، لحد مسلسل صالون زهرة اللي عمل قلبان وقت نزوله.. نادين نجيم لازم تكون من أوائل الفنانات على رادارك.

ويجز

استغربت من وجود اسم مغني راب في قائمة ممثلين مش كده؟ لا ماتستغربش! ويجز مؤخرًا ظهر في مسلسل بيمبو اللي حقق فيه نجاح كبير لدرجة خلت البعض يقول إنه ممكن يكون عنده موهبة أكبر في التمثيل عن الغنا.. فاستنوا ويجز في 2022 لإنكم ممكن تلاقوه اكتسح في المسلسلات والأفلام زيّ ما اكتسح الراب سين!

رنا رئيس

رنا اللي شوفناها في مسلسل موضوع عائلي بشخصية سارة اللي عمل ضجة كبيرة، يستحق إننا نحط رنا رئيس في الرادار بتاعنا لإنها فعلًا فنانة متمكنة من أدواتها في التمثيل.. ممكن تخليك تعيط وتضحك في نفس المشهد!

محمد فراج

عن: رؤية

محمد فراج بيقدر كل سنة إنه يثبت نفسه كممثل شامل. فعلًا بيقدر يغير من جلده، ويقنعنا بكل الشخصيات اللي بيقدمها رغم تناقدهم واختلافهم. محمد فراج مش بس المفروض يكون على رادارك لسنة 2022، لكن كل سنة!

حنان مطاوع

حنان مطاوع من الممثلات اللي صعب يختلف عليها اتنين. من شكلها المصري الأصيل لأدائها الراقي وتفانيها في شغلها والأدوار اللي بتقدمها، حنان مطاوع فعلًا معجونة بمياه الفن.

سيد رجب

شخص شرير ولا طيب ولا بسيط ولا جواه مشاكل نفسية محتاجة تتعالج.. عمرنا ما هنعرف. ببساطة لإن سيد رجب بيقدر يقنعنا كمشاهدين بكل وأي دور بيقدمه… فنان أورجانيك!

آخر كلمة: مين تاني من الفنانين شايفين إنه لازم يكون على رادار المشاهدين سنة 2022؟

تعليقات
Loading...
Tweet
Share
Share
Pin