بعد الـ 3 متاحف.. تعالوا نعرف إيه المتاحف الجديدة اللي هتتفتح قريب

من فترة قريبة، افتتح الرئيس عبد الفتاح السيسي رئيس الجمهورية، 3 متاحف أثرية جديدة في 3 محافظات مختلفة وهما متحف شرم الشيخ، ومتحف كفر الشيخ، ومتحف المركبات الملكية في القاهرة، وكان حدث استثنائي جدًا لإن أول مرة يتفتح 3 متاحف مهمة في يوم واحد، وده من ضمن خطة الدولة لافتتاح متاحف جديدة علشان تبين الحضارة المصرية على مدار العصور، وكمان لسه فيه متاحف تانية هتتفتح قريب فتعالوا نعرفهم مع بعض.

المتحف المصري الكبير

ده مكانه قريب من أهرامات الجيزة، وهيكون أكبر متحف للآثار في العالم، وهيستوعب 5 مليون زاير في السنة، وهيضم أكتر من 100 ألف قطعة أثرية من العصور الفرعونية، واليونانية، والرومانية، وشكل العمارة فيه هتكون مختلفة، وتكلفته تقريبًا 550 مليون دولار، وكمان هيكون فيه مباني الخدمات التجارية والترفيهية ومركز الترميم والحديقة المتحفية اللي هيتزرع فيها الأشجار اللي كانت معروفة عند المصري القديم.

متحف العاصمة الإدارية

مكانه في مدينة الفنون والثقافة بالعاصمة الإدارية الجديدة، وهو على مساحة 8500 متر مربع، وهيتكون من دورين، والمتحف ده هيعرض آثار لـ 9 عواصم لمصر القديمة والحديثة، وهما منف، وطيبة، وتل العمارنة، والأسكندرية، والفسطاط، والقاهرة الفاطمية، ومصر الحديثة، والقاهرة الخديوية، والعاصمة الإدارية، وهيضم 1000 قطعة أثرية، ومقبرة توتو، وهيبقى فيه عند مدخله مسلتين، وتمثال الملك رمسيس الثانى اللي موجود في المتحف المفتوح بميت رهينة، وكمان أجزاء من كسوة الكعبة القديمة.

المتحف القومي للحضارة المصرية

ده مكانه في الفسطاط بمنطقة مصر القديمة بالقاهرة، والمشروع بالتعاون مع منظمة اليونسكو، علشان يكون من أكبر متاحف الحضارة في مصر والشرق الأوسط، بتكلفة حوالي 600 مليون جنيه، وهيعرض 1500 قطعة أثرية، بتضم مجموعة الكاهن سنجم من عصر الدولة الحديثة، ومجموعات تماثيل لخدم من الدولة القديمة، وكمان مجموعة تماثيل خشب ملونة لآلهة من عصر أمنحتب الثاني، ومجموعة أواني وتمائم بتاعت الملك تحتمس الرابع متصنعة من الفيانس الأزرق.

متحف المطار

موجود في صالة (3) بمطار القاهرة الدولي، وافتتاحه الأول كان في سنة 2016، لكن بيتم تطويره دلوقتي، وقبل التطوير كان بيضم 39 قطعة آثرية، لكنه اتنقل لقاعة جديدة بمساحة أكبر في نفس الصالة، وكمان بيتم إنشاء قاعة جديدة داخل صالة (2) بالمطار بمساحة 150 متر، وهيعرض 70 قطعة آثرية، اختاروها من مخازن المتحف المصري بالتحرير والمتحف اليوناني الروماني ومتحف السويس، وكمان هيبقى فيه تمثال من البرونز للإلهة إيزيس المجنحة، وهي لابسة قرنين حتحور وبينهم قرص الشمس.

آخر كلمة: ماتفوتوش قراءة: بالصور: متحف الغردقة، كنز تاريخي مصري على ساحل البحر الأحمر.

تعليقات
Loading...
Tweet
Share
Share
Pin