بعد إعلان سلطنة عمان إلغاء التأشيرات لرعايا 103 دولة، منهم 7 دول عربية هما: مصر وتونس والأردن والجزائر ولبنان والمغرب وموريتانيا، وأبناء الدول دي يقدروا يحصلوا على إقامة سياحية لمدة توصل لـ 10 أيام من غير تأشيرة دخول، والخطوة دي لدعم السياحية خصوصًا بعد اللي سببته جائحة كورونا من خساير اقتصادية كبيرة، وعلشان تستغل الفرصة دي في أقرب وقت تسافر فيه لعمان، جبنالك أماكن مينفعش تفوت زيارتها خصوصًا بعد تسهيل السفر والسياحة بعد القرار، وكمان لإن الوقت ده من السنة هو أحسن وقت لزيارة البلد في الفترة بين شهر أكتوبر وشهر أبريل.
لو انت من الناس اللي بتحب السياحة التاريخية والأثرية وبتستمتع وانت بتزور المتاحف والأماكن القديمة، دي أحسن أماكن تزورها في عمان:
المتحف الوطني العماني
المتحف موجود في العاصمة مسقط، وبيضم مجموعة من الموروثات من التراث العماني من زمان ولحد دلوقتي، ويعتبر مركز لحفظ التراث العماني، وبيتكون المتحف من 14 قاعة و43 منظومة عرض تفاعلي رقمي، وبيضم قاعة عرض صوتية ومرئية بتقنية الـ UHD، ودي الأولى من نوعها، المتحف كمان فيه مركز للتعلم بيتبنى طريقة برايل علشان يسمح للزوار المكفوفين إنهم يزوروا المتحف ويقدروا يقروا الكتب القيمة اللي فيه، وسعر دخول المتحف 5 ريال عماني.
قلعة نزوى
قلعة من أقدم وأهم الأماكن السياحية في عمان، تقدر من خلالها تشوف معظم المعالم في المدينة اللي مليانة بالأشجار والنخيل وكمان الآثار المنتشرة في المدينة، والقلعة بتحتوي على برج بتطلعله بسلم حلزوني، وعلى قاعات معروض فيها نماذج من ملابس بترجع للعصر اللي اتبنت فيه القلعة في القرن الـ 17 الميلادي، وقاعات تانية متقسمة لغرف.
أما لو بتحب السفر والمغامرات واكتشاف أنشطة مجربتهاش قبل كده، ممكن تجرب الأماكن دي:
مدينة صور
تحديدًا في رمال الشرقية، تقدر تستمتع بالمنظر الرائع للرمال وتجرب أنشطة مختلفة خصوصًا في فصل الشتاء، هتقدر تستمتع بجو دافي وتجربة مميزة بالهدوء والاستجمام، وكمان الإثارة في سباقات السيارات، أو التزلج على الرمال، ورياضة المشي على الكثبان الرملية.
وادي شاب
يعتبر من أجمل الوديان في عمان، تقدر تستمتع فيه برحلة مميزة بطبيعة خاصة بين المياه والحدائق والجو المميز، كل ده في منطقة ساحلية بتجمع الشاطئ مع الجبال والأشجار، مكان يستحق يكون في قائمة أولويات سفرك علشان تقضي رحلة استجمام مش هتنساها.
الجبل الأخضر
من اسمه، تقدر تستمتع بالأجواء الجبلية وتتسلق الجبل وتستمتع بمشاهدة منظر بانورامي رائع، لكن على القرى الخضراء من صحراء ورمال بس، لإنه بيتميز بوجود قرى ووديان منحدرة، علشان كده، لو بتحب تستكشف الطبيعة، المكان ده هيكون وجهة مثالية ليك.
قرية وادي الجنز
محمية طبيعية ساحلية على مسافة 45 كم بامتداد الساحل، وفيها عدد من قرى الصيادين الأثرية القديمة، واكتشفوا فيها عدد من الآثار العمانية القديمة، وكمان فيها عدد من المقابر والآثار بيرجع عمرها لأكتر من 6 آلاف سنة، تقدر تستمتع فيها بمزيج من السياحة الأثرية التاريخية وكمان رحلات الاستجمام.