بطل الدقيقة 90: ازاي الأهلي اتربع على قائمة أكتر الأندية تحقيقًا لكأس السوبر الأفريقي؟

نادي القرن أو بطل الدقيقة 90 كلها ألقاب ممكن نديها للنادي الأهلي، ألقاب ماتقالتش من الفراغ! لأ ده كل مرة بيثبت إنه يستحقهم عن جدارة! وفي أخر ماتش له امبارح أثبت إنه فعلًا يستحق بطل الدقيقة 90، بعد ما حبس أنفاسنا كلنا وشبه ضاع الأمل بحلم الحصول لكأس السوبر، قدر الفريق وبمنتهى السلاسة إنه يجيب الجول في اللحظات الأخيرة من نهاية المباراة ورجع الأمل بهدف التعادل اللي جابه! وده لإن دايمًا الأهلي معود جمهوره على الفرحة المختلفة، فرحة الدقائق الأخيرة غير أي فرحة! الجول اللي ييجي في أول الماتش غير اللي ييجي في أخره!

وبعد الماتش ده نقدر نقول إنه اتربع على قائمة أكتر الأندية الأفريقية تحقيقًا لكأس السوبر الأفريقي بـ8 مرات على التوالي! وفي أكتر تصريح مميز ممكن تسمعه عن الأهلي قاله أنفانتينو رئيس الفيفا “في كل حدث هام بأفريقيا أحضره، أجد الأهلي المصري يتوج به! منذ عامين وأنا لا أسلم جوائز سواء للأهلي!” وده لإن الأهلي السنة دي بس قدر إنه يحقق تلات بطولات أفريقية!

دولاب بطولات نادي القرن مع السوبر الأفريقي

الأهلي- الرجاء المغربي

الماتش كان في الدقائق الأخيرة وكان الرجاء متقدم بهدف عن الأهلي، بس الجمهور مافقدش ثقته في ناديه وفضل لأخر لحظة يشجع لحد لحظة الدقيقة 90! وفي الدقيقة دي وصلت الكرة لمحمد شريف ولعبها لمجدي أفشة ولما اتدخل الحارس وصلت الكرة لبيرسي تاو ومن بعدها لطاهر محمد طاهر اللي قدر إنه يسددها في الشباك! وفي نفس اللحظة أطلق الحكم صفارة نهاية الماتش بتعادل الفرقتين، ورجع الأمل لجمهور الأهلي من تاني! ومن بعدها نقلوا لركلات الترجيح واللي طبعًا فاز بها النادي الأهلي في النهاية!

وفي القائمة دي حبينا نبدأ بأخر بطولاته وبعدها نبدأ من الأقدم للأحدث في دولاب بطولات نادي القرن!

الأهلي- كايزر تشيفز

في مارس سنة 2002 كان أول مباراة يكسبها الأهلي في السوبر الأفريقي وتاني مباراة يلعبها في البطولة نفسها، وكانت بينه وبين كايزر وفاز فيها بأربع أهداف مقابل هدف واحد، وكان فيها جول عصام الحضري الشهير، اللي سدده من الجول للجول، واللي جاب الأجوال هما خالد بيبو في الدقيقة السابعة، وحسام غالي في الدقيقة 30 وعصام الحضري في الدقيقة 65 وسيد عبد الحفيظ اللي ضيع أمال الفريق المنافس بأخر جول.

الأهلي – الجيش الملكي

في فبراير 2006، انتهي بالتعادل السلبي بين الفريقين ولجأوا لركلات الترجيح، واللي جاب الأجوال، عماد النحاس وأسامة حسني وشادي محمد وإسلام الشاطر، وقدر عصام الحضري إنه يسد ركلتين ترجيح للفريق المنافس.

الأهلي- النجم الساحلي

في فبراير 2007 انتهي الماتش بالتعادل السلبي بين الفريقين، بس كانت ركلات الترجيح هي البطل في الماتش بخمس أجوال قصاد أربعة، وهي اللي توجت الأهلي بكأس السوبر للمرة التالتة على التوالي، وفي نفس الوقت كانت المرة التانية اللي تقوده ركلات الترجيح للفوز، وده عن طريق اللاعب شادي محمد وعماد متعب وفلافيو واستاكوزا وعماد النحاس.

الأهلي – الصفاقسي

في فبراير 2009 فاز الأهلي للمرة الرابعة في تاريخه بالسوبر الأفريقي بهدفين من فلافيو في الدقيقة 47 و 70.

الأهلي- ليوباردز

في 23 فبراير 2013 كسب الأهلي بجولين مقابل جول بقدم رامي ربيعة في الدقيقة 55 ومحمد بركات في الدقيقة 70.

الأهلي – الصفاقسي

في 20 فبراير سنة 2014 كسب الأهلي بتلاتة مقابل اتنين، ووقتها عمر جمال هو اللي جاب الجولين في الدقيقة 54 و69 ومحمد ناجي جدو أحرز التالت في الدقيقة 23.

الأهلي- نهضة بركان المغربي

في 2020 قدر إنه يسجل هدفين بدون رد من الفريق المنافس، واللي سجله محمد شريف وصلاح محسن في الدقيقتين 57 و67 على الترتيب.

في النهاية: الأهلي قادر إنه يسعد جمهوره بأي شكل من الأشكال وعلى مدار مشواره الكروي كله، سواء بلعبه النظيف أو بروحه اللي بتبقى في الملعب ساعة الهزيمة أو الفوز، وماننساش سحره في الدقائق الأخيرة اللي قادرة تقلب الملعب من حال لحال!

أخر كلمة: ماتفوتوش قراءة: ازاي الجمهور المصري أظهر حبه ودعمه لعمرو السولية؟

تعليقات
Loading...
Tweet
Share
Share
Pin