الفترة اللي فاتت، شوفنا أخبار كتير عن الفنان هاني شاكر، بسبب بعض قراراته في نقابة المهن الموسيقية اللي تعلقت بوقف بعض مطربين المهرجانات. فالساحة الغنائية شهدت وقف كتير من مطربي المهرجانات والرابرز مؤخرًا، سواء بسبب كسرهم لبعض قوانين جديدة لنقابة المهن الموسيقية، أو لتقديمهم أغاني تم اعتبرها مسيئة أو مبتذلة.
القرارات اللي أخذها هاني شاكر كنقيب للموسيقيين، اتلاقت بآراء مختلفة. ففي اللي شاف إن وقف بعض مطربي المهرجنات وتنفيذ القرارات بحزم، هو شيء إيجابي ولا بد منه للحفاظ على الوسط الفني. ولكن كان في كمان كتير من الهجوم والاتهامات بعدم تقبل “الفن الجديد”.ووسط كل الشد والجذب ده، توصل هاني شاكر لقرار.
خلال برنامج “حبر سري”، صرح الفنان هاني شاكر إنه لا ينوي الترشح لدوره نقابية جديدة، لما سألته المذيعة إنه قال الكلام ده قبل كده، وإذا كان لسه عند قراره.. فقال خلال اللقاء “طبعًا خلاص دي آخر فترة بالنسبة لي لأني تعبت، أنا اتفاجأت بتعب ضربات قلبي ودخلت بيه المستشفى والدكاترة قالوا أبعد عن الانفعالات ودي أخر فترة، أكيد رسالتي مأدتهاش كاملة ولكن حاولت إني أوصلها وأحافظ على الفن المصري.”
هاني شاكر حاليًا في صحة أفضل، ولكنه شايف إن فترتين في النقابة كافية جدًا، وده اللي صرح بيه خلال الحوار. “أنا بقيت أحسن ومكمل على العلاج وشايف أنى أكمل الفترة دي وكفاية فترتين بالنسبة لي وحاسس أنى عملت حاجات كتير نفسي فيها وكنت أتمنى حاجات أفضل”.
أما بالنسبة لملف أغاني المهرجنات، فقال هاني شاكر إن النقيب اللي هييجي بعده مش مُلزم إنه يتبع قرارته القديمة. ولما اتسأل لو ممكن النقيب الجديد يرجع أغاني المهرجنات، قال شاكر إن ده قرار يرجع له وهيكون النقيب الجديد حر فيه.