برودة الطقس والجوع، إيه علاقتهم ببعض؟

بيدخل علينا الشتا ومع برودة الجو بيزيد عندنا الإحساس بالجوع بسبب ومن غير سبب، وخصوصًا بليل لما بيبقى صديقك المفضل هو التلاجة، طب الموضوع ده له أسباب حقيقية ولا مجرد شيء مُرتبط معانا بموسم بس؟

في دراسات بتقول إن الموضوع ممكن يكون مربوط بـ”الميتوكوندريا” ودي عبارة عن عضيات خلوية موجودة في الجسم ومسئولة عن حرق الدهون وإنتاج الطاقة، وهي دورها إنها تحرق سعرات حرارية أكتر علشان تحافظ على درجة حرارة الجسم، فالجسم بيتضطر إنه ياخد من المخزون اللي عنده واللي بتبقى في شكل دهون. ده غير إنه في الأساس، جسمك بيحرق سعرات حرارية لوحده لما بيحس بالبرد علشان يدفي نفسه.

ده بالنسبة للأسباب العلمية اللي ممكن نحط تحتها خطوط كتير، بس على الجانب التاني، في أسباب متعلقة بجوانب تانية كتير منها النفسية واللي بتخلي الجسم بشكل تلقائي يحتاج إنه ياكل كتير والمخ بيأهلك لكده.

زيّ الفكرة اللي بتقول إن فصل الشتا هو فصل اكتئاب، وإن ناس كتير وهي مكتئبة الأكل بيبقى هو ملجأها الوحيد. وفي ناس أصلًا من قبل دخول الشتا بتبقى عاملة نظام أو system لنفسها وحاطة في دماغها إنها هتزيد في الوزن وتقول ده شتا وأكل كتير، وبالتالي مش بياخدوا بالهم من نوعية الأكل اللي بيتاكل ولا إذا كان بيتسبب في زيادة الوزن ولا لأ.

وعلشان نتجنب ده، نعمل إيه؟

نركز على الأطعمة اللي عندها قدرة إشباع عالية، وفي نفس الوقت سعراتها الحرارية مش عالية زيّ الفاكهة والخضار، وممكن نبدأ الأكل بسلطة أو بشوربة خضار علشان نقلل عندنا إحساس الجوع. وممكن كمان نزود الأكلات اللي بتحتوي على الحبوب الكاملة، زيّ الشوفان والرز البني والحاجات اللي فيها ألياف مُشبعة، كإنك بتخدع معدتك بظبط. ويُفضل برضه أول مانحس ببرد نعمل حاجة سخنة تدفينا وسعراتها الحرارية تبقى قليلة.

وسبب أساسي في الأكل الكتير برضه هو قلة الحركة في الفصل ده، وقت الأنشطة بتاعته قليلة بسبب برودة الجو ومافيش غير إنك تقعد تحت البطانية طول اليوم، فلو بدأنا نعمل مجهود وحركة أكتر حتى لو لخبطنا في الأكل، هنقدر نحرق اللي دخل معدتنا.

وحاجة أخيرة برضه بتتسبب في إحساسنا بالجوع وممكن نتجنبها هي إننا مش بنشرب مياه كتير في الشتا، ووقت ما بنحس بعطش الموضوع بيختلط معانا، ومش بنبقى عارفين ده إحساس جوع ولا إحساس عطش والعقل مش بيعرف يميز، فلو شربت مياه بكميات معتدلة، ده هيساعد في زيادة إحساسك بالشبع.

الشتا من الفصول المُحببة عند ناس كتير وتفاصيلها بنستناها كل سنة علشان بتحسسنا بالسعادة، فحتى لو هنزيد، برضه هنفضل نحب الشتا.

أخر كلمة: ماتفوتوش قراءة: 6 أكلات ماينفعش تفوتنا في فصل الشتا

تعليقات
Loading...
Tweet
Share
Share
Pin