برج القاهرة وأول ناطحتين سحاب في مصر.. مين هو المعماري نعوم شبيب؟

مش ناس كتير تعرف مين اللي ورا المعمار المميز لبرج القاهرة، ومتعرفش إنه مصري وعمل إنجازات كبيرة في مجال المعمار من زمان في وقت ماكنش فيه كتير متميزين في المجال ده خصوصًا وإن الإمكانيات كانت قليلة ساعتها، المعماري المصري نعوم شبيب اللي يعتبر رائد العمارة الحديثة في مصر، وعمل مباني كتير حلوة وفريدة من نوعها لحد النهارده، أشهرهم مبنى جريدة الأهرام وكنيسة سانت كاترين في مصر الجديدة وكنيسة سانت تريز في بورسعيد، وأول ناطحتين سحاب في مصر.. فتعالوا نعرف مين هو نعوم شبيب.

عن: Viator

نعوم اتولد سنة 1905، واتخرج من هندسة جامعة القاهرة بتقدير امتياز مع مرتبة الشرف، وسنة 1940 عمل شركته للإنشاءات والمقاولات بالقاهرة، وحط المعالم الأولى لهندسة معمارية عصرية، وعبقريته بتتمثل في إنشاء نوع من المسطبات الهندسية اللي بتقدر تتغلب على مشكلة التربة عند إنشاء ناطحات السحاب، وكمان عمل الأقواس والقباب الهندسية بطريقة جديدة، وممكن القبة الواحدة تغطي حوالي 800 متر مربع، وكمان سجل براءة اختراع (قباب شبيب) من سنة 1946.

وهو اللي عمل برج القاهرة، بارتفاع 187 متر ونص، واللي بيعتبر أطول مبنى في مصر وأفريقيا، ووقت لما كان بيتبني كان أعلى برج من الخرسانة المسلحة في العالم، وكمان عمل أول ناطحتين سحاب “برج الراديو” سنة 1954، بارتفاع 22 دور (76 متر) بشارع رشدي بوسط القاهرة، و”عمارة بلمونت”، اللي اتسمت كده علشان كان عليها إعلان لسجائر بلمونت استمر فترة طويلة، واتبنت سنة 1958 في جاردن سيتي.

وبنى كنيسة سانت كاترين في ميدان تريومف في مصر الجديدة سنة 1950، اللي دايمًا هتخطف نظرك وأنت ماشي جنبها وهتركز في معمارها وجمال التصميم والطريقة اللي اتبنت بيها، وبتعتبر من أشهر معالم منطقة مصر الجديدة، وعمل كنيسة سانت تريز في بورسعيد، اللي بتطل على قناة السويس، وكمان نعوم بنى سينمات ومحلات وعمارات سكنية ومصانع ومدارس، وأضاف كتير لعالم المعمار في مصر.

آخر كلمة: إيه أكتر مبنى بيلفت نظرك منهم؟

تعليقات
Loading...
Tweet
Share
Share
Pin