بتشتغل أونلاين؟ دي مدن هتساعدك تشتغل أحسن وبمزاج رايق

بسبب فيروس كورونا وخصوصًا دلوقتي وإحنا في الموجة التانية منه ووسط تزايد أعداد الإصابات، كتير من الشركات حولت نظام الشغل للأونلاين، وناس كتير دلوقتي بتشتغل من البيت، حتى الدراسة بقت عن بعد، وكلنا محتاجين نبقى دماغنا صافية وفي مود رايق علشان نقدر نقدم أحسن حاجة عندنا خصوصًا في الشغل وسط التوتر والقلق اللي بيصيبنا كلنا من كل اللي حاصل بسبب كوفيد-19، علشان كده فكرنا في أماكن ومدن يكون جوها وطبيعتها بتساعد على الاسترخاء، ومش زحمة علشان تكون فرصة لتغيير جو، وفي نفس الوقت بأمان.

الفيوم

من أكتر المحافظات في مصر اللي بتتمتع بالهدوء والطبيعة المختلفة اللي بتميزها عن أي مدينة تانية، ومناسبة للاسترخاء والاستجمام في مناخ صحي بعيد عن الزحمة، وبتتمتع بأجواء ريفية طبيعية هادية، وكمان مش بعيدة عن القاهرة، حوالي 100 كم وتكون هناك.

جزيرة الجفتون

عن: Lifebeyondex

من أجمل الجزر في الغردقة، وتُعتبر جزيرة الجفتون أول محمية طبيعية موجودة في البحر الأحمر، وبتتميز بجمال الطبيعة والأشجار والنباتات الخضراء والشاطئ الرائع بالمياه الفيروزية والرمال الذهبية، ومش ناس كتير بتزور الجزيرة دي، وهناك تقدر تستجم وتشتغل ببال رايق.

مرسى مطروح

خصوصًا إن إحنا دلوقتي مش في موسم الصيف، مرسى مطروح بتكون هادية جدًا في الوقت ده من السنة، تقدر تروح تستمتع بالجو المميز ليها في وسط الهدوء والاستجمام ده، في وسط الرمال الناعمة اللي مشهورة بيها، والمياه الصافية.

طابا

رغم زحمة الجزء الشرقي ده في مصر في جنوب سيناء، والناس بقت بتروح دهب ومرسى علم كتير، ممكن تتجنب الزحمة في الأماكن دي لكن تتمتع بنفس الأجواء.. في طابا وسط الجبال والبحر بأماكن كتير هتقدر فيها تحصل على الراحة والاستجمام اللي تقدر بعدهم تشتغل بطاقة أحسن.

واحة سيوة

في أقصى صحراء مصر الغربية، واحدة من أهم وأشهر الواحات في العالم، والزراعات المنتشرة وأشجار النخيل والزيتون في تربتها الخصبة والمياه الجوفية العذبة، وكمان البحيرات وعيون المياه الطبيعية، وحفاظ سكان الواحة على الطابع التقليدي والتراثي، ووسط كل ده هتستمتع بأجواء مناسبة للشغل في هدوء.

بورسعيد

يمكن لما نقول أماكن سياحية في مصر مش هيجي في بالك إننا نقول بورسعيد، لكنها مدينة جميلة وأسعار الإقامة فيها رخيصة، وبتتمتع بمكان متميز على البحر وفي نفس الوقت مميزات المدينة، ومش هتحس بغربة لما تكون هناك، وهتقدر تستفيد بالاستجمام.

آخر كلمة:ماتفوتوش قراءة: 10 أماكن في مصر مش واخدين حقهم في السياحة.

تعليقات
Loading...
Tweet
Share
Share
Pin