فكرة اللقاء التليفزيوني الرسمي أو الـ”Formal” بدأ يختلف في الفترة الأخيرة بسبب فيروس كورونا وتداعياته.. فبدأنا نشوف لقاءات بتتعمل من على tablets، وتطبيق زووم وكمان شوفنا مقدمين كبار زيّ ريا أبي راشد بتقدم برنامجها من جنينة بيتها، حفاظًا على الإجراءات الاحترازية.. كل ده طبيعي ومقبول، لكن إن إحنا نشوف انترفيو من على سرير وتحت البطانية؟ ده اللي فعلًا جديد!
اليومين اللي فاتوا شوفنا سيول من الكوميكس والميمز على مواقع التواصل الاجتماعي، بصورة لضيفة ومذيعة عاملين حوار تليفزيوني من تحت البطانية.. وطبعًا إحنا ما بنصدق نلاقي حاجة علشان نعمل عليها ضجة على السوشيال ميديا.. بس قبل ما نوريكم شوية من الكوميكس اللي شوفناها، تعالوا نقولكم أصل الحكاية إيه؟ وسبب إن الانترفيو يكون على السرير، هو إن ضيفة الحلقة المطربة المغربية سعيدة شرف، كانت اتعرضت لحادث أثناء تصويرها برنامج “كامير خفية”، ورجلها اتكسرت، ولإن المطربة كانت مريضة وعلى سريرها بسبب الحادثة، فقررت مذيعة البرنامج إنها تعمل الحوار من على السرير.
أما بالنسبة للتعليقات الساخرة اللي الناس قالتها، فكان معظمها بيدور حوالين فكرة إن الدنيا “ساقعة جدًا” لدرجة إنهم ماقدروش يعملوا اللقاء بعيد عن البطانية، وناس تانية قالت إن دي دفعة إعلام اللي هتتخرج أونلاين ولكن العنصر المشترك بين كل الميمز، هو إن اللقاء كان غريب بالنسبة لهم.. ورغم وجود سبب لإجرائهم اللقاء بالشكل ده، بس الناس على السوشيال ميديا مابيستنوش يسمعوا التبرير، وبينطلقوا في عمل الميمز على طول!
إيه رأيكم في الموضوع ده؟ وهل بعد ما عرفتوا تبرير إجراء اللقاء التليفزيوني من السرير وبالشكل ده، لسه شايفين الموضوع غريب ولا قدرتوا تتقبلوا الفكرة.. وهنبدأ نشوف برامج بعد كده بتتعمل بنفس الطريقة ومش هنستغربها وقتها؟