بالصور: الجوف.. درة المملكة الخفية

0

حدائق الزيتون، والنخل الشامخ، والحضارة العتيقة، الجوف في شمال المملكة العربية السعودية هي واحدة من الدرر الخفية اللي مش معروفة لناس كتير. في قلب صحراء النفوذ، الجوف مليانة مناظر طبيعية جميلة ومختلفة من الكثبان الرملية الذهبية لأشجار برية وواحات خلابة.

المنطقة في شمال غرب السعودية بتعتبر بوابة المملكة لأرض الشام، وتقدر توصلها عن طريق مطارها الأقليمي أو الطرق السريعة، بس أهلها بينصحوا إنك تيجي بالقطر عشان تستمتع بجولة في وسط الصحراء وجمال طبيعي ملهوش مثيل.

منطقة الجوف هي واحدة من أغنى مقاطعات المملكة بالآثار اللي بيرجع عمرها لألاف السنين، ونظرًا لموقعها الجغرافي المميز، فالحضارات دي مكنش بس أصلها عربي بس كان في منها شامي ومن بلاد الرافدين. أشهر الآثار هناك هيّ النقوش الحجرية المنتشرة في أماكن كتير في صحراء النفوذ، بس يمكن نصيب الأسد من التنوع الحضاري كان في قرية الشويحيطة اللي قدر علماء الآثار يرجعوا أصل النقوش فيها لأيادي أغريقية ونطبية وإسلامية.

من الآثار الإسلامية في المنطقة، مسجد بناه الصحابي عمر بن الخطاب في سنة 16هـ في منطقة دومة جندل في طريقه لمدينة القدس بعد فتحها؛ المسجد في دومة جندل لسه قائم وشغال لحد يومنا ده، وبترجع أهميته لكونه واحد من أقدم مساجد العالم. مش بس كده، الجوف مليانة حصون تاريخية قديمة زيّ حصن مارد في دومة جندل وحصن زعبل في سكاكا، ده بالإضافة لمواقع أثرية مشهورة زيّ بئر سيسرا وسوق دومة الجندل وقصر كاف.

في عام 2007، مشروع زراعة الزيتون في منطقة الجوف تحول من فكرة لأكبر مزرعة عضوية للزيتون في المنطقة، وبقى بينتج حوالي 2% من سوق الزيتون في العالم كله. الجوف فيها 15 مليون شجرة من 30 فصيلة مختلفة، متوزعة على 12 ألف مزرعة و3 آلاف مشـروع زراعي. مش بس كدا، أهل الجوف ليهم باع مع زراعة النخل وانتاج التمر، وده تقليد عربي أصيل بيرجع لألاف السنين، في المنطقة حاليًا فيه أكتر مليون ومتين ألف نخلة بينتجوا أطنان من واحد من أجود أنواع التمر في العالم كله. المنطقة هي عبارة عن بستان كبير مُحاط برمال الصحراء من كل حتة، في مشهد طبيعي خلاب مش موجود في أي مكان تاني في العالم.

في السنين الأخيرة، المملكة بدأت تتجه للاستفادة من الموقع الجغرافي للجوف، وبدأ مشروعين واحد لتسخير الطاقة الشمسية في مدينة سكاكا وواحد لاستغلال طاقة الرياح في دومة الجندل، وعشان كده الجوف معروفة في السعودية بإنها عاصمة الطاقة المتجددة.

عن سبق.

مع فتح السياحة في المملكة وبدأ اقبال ناس كتير على مناطق زي جدة والرياض والعلا، كتير ميعرفش درر خفية كتير زيّ الجوف، وعشان كدا قررنا نجيبلكم صور ليها عشان تقدروا تستمتعوا بجمالها!

أخر كلمة: مستني إيه؟ يلا حضر شنطتك وإحجز طيارتك، الجوف في انتظارك!

تعليقات
Loading...