منطقة البلوهول أو الثقب الأزرق في محمية أبوجالوم بدهب بتُعد واحدة من أجمل وأفضل أماكن الغطس في العالم، وبتضم مجموعة من أندر الأسماك والشعاب المرجانية الفريدة اللي بيجلها ألاف الزوار من مُختلف دول العالم كل سنة. بيبلغ عمق البلوهول حوالي 130م وهو فيه ممرات وكهوف تحت المياه بتوصله بالبحر، وعلى الرغم من شهرة المكان بالطبيعة الخلابة إلا إنه مشهور كمان بكثرة وقوع حالات الوفيات للغواصين فيه لدرجة إنهم أطلقوا عليه “مقبرة الغواصين” وفي نصب تذكاري ليهم هناك.
كثرة وقوع حوادث الغرق مكنتش المشكلة الوحيدة اللي بتواجه زوار البلوهول، المكان -زي أغلب المحميات الطبيعية في مصر- مفيهوش خدمات كافية للغطاسين والزوار، ومكنش جاهز لاستيعابهم ولا فيه عدد كافي من لافتات التنبيه للأماكن اللي ممنوع العوم أو الغطس فيها. وعلشان كده اتبنت وزارة البيئة المصرية بالتعاون مع مشروع الأمم المتحدة الإنمائي تنفيذ مشروع تطوير المحميات المصرية، وكان البلوهول آخر المحميات اللي تم تطويرها ورفع كفاءتها باستخدام الحجارة والأخشاب والمواد الصديقة للبيئة.
اتولى تنفيذ المشروع مؤسسة Hand Over وهى مؤسسة اجتماعية مُهتمية بالاستدامة واستخدام المواد المحلية والصديقة للبيئة فى إنشاء المساكن والمبانى الخدمية. وبالفعل اعتمد المشروع بشكل أساسي على استخدام التربة المدكوكة أو Rammed-Earth اللي بتتكون من مكونات طبيعية محلية زي الرملة والزلط والطفلة، وده بالإضافة للأحجار والأخشاب.
احنا اتكمنا مع المهندسة رضوى رستم صاحبة مشروع Hand Over، وفهمنا منها إن عملية تطوير المحمية اتضمنت ثلاث مباني منهم مبنى للإدارة فيه مكان لحجز التذاكر، ومبنى لدورات المياه بنظام الـ Dry toilets أو المرحاض الجاف لتوفير استخدام المياة، ومبنى آخر للأمن الخاص بالمحمية على مستوى أعلى منها علشان يكون مغطي المنطقة كلها.
وبالنسبة للزوار اللي من الأهداف الأساسية للمشروع جذب أعداد أكبر منهم للمنطقة وتنظيم زيارتهم ليها، فالطريق للمحمية كان وعر وصعب على العربيات تمشي فيه، وعلشان كده تم تمهيده لتسهيل الحركة، وتم بناء مظلات واماكن جلوس للزوار والغطاسين، والأهم من كده تم بناء سور بطول الشاطئ كوسيلة للمساهمة في الحفاظ على سلامة الزوار وتنبيهم لمناطق الشعاب المرجانية علشان يتجنبوها.
وكانت من ضمن مشاكل البلوهول عدم وجود أي لافتات لأماكن الغطس المختلفة أو علامات بتوضح معالم ومباني المنطقة والخدمات المتاحة فيها وعلشان كده تم إضافة مجموعة من اللافتات والعلامات التوضيحية اللي هتخلي التجربة أمتع وأسهل بكتير لكل الزوار.