من انسحاب الضيف لوقف البرنامج: أزمة مي حلمي اللي أدت لمنعها من الظهور على وسائل الإعلام

من امبارح انتشر فيديو بجزء من حلقة برنامج الحكم، اللي بتقدمه مي حلمي، باستضافة نجم الزمالك السابق الكابتن أحمد صالح نجم، وأثناء المناقشة على احتفال ومراسم تسليم درع الدوري لنادي الزمالك، واحتدت المناقشة وأدت لانسحاب الكابتن من الحلقة بسبب أسلوب الحوار، وبعد انتشار الفيديو الناس هاجمت المذيعة واتهمتها بعدم المهنية، وناس كتير ومشاهير علقوا على الفيديو واللي حصل فيه وأسلوب المذيعة مع الضيف.

الناس ابتدت تقول رأيها على السوشيال ميديا عن اللي حصل، بعيدًا عن أي اختلافات أو انتماء كروي، أهلاوي أو زملكاوي، ناس كتير رفضت أسلوب المذيعة واللي وصفوه بعدم المهنية، وإنها لازم تتحاسب، وإن ده يعتبر تحيز وعدم حيادية.

Posted by Abdalrhman Hamdi on Sunday, August 29, 2021

بعدها، قررت قناة الحدث اليوم، إنها توقف برنامج الحكم، وكمان القرار شمل إحالة مي حلمي للتحقيق. وقف البرنامج هيستمر لحين الانتهاء من التحقيق معاها في الواقعة.

وصدر قرار من نقابة الإعلاميين بمنع مي حلمي من الظهور على أي وسيلة إعلامية داخل جمهورية مصر العربية، لمخالفتها ميثاق الشرف الإعلامي ولعدم تقنين اوضاعها مع النقابة، وده بعد تقرير المرصد الإعلامي الخاص بالنقابة، واللي أوصى بإنها خالفت ميثاق الشرف الإعلامي ومدونة السلوك المهني.

آخر كلمة: ماتفوتوش قراءة: بعد فيديو ريهام سعيد وأم نور، هتفضل لحد إمتى فيه أزمة محتوى مصر؟

تعليقات
Loading...
Tweet
Share
Share
Pin