بواسطة منة حسني.
الأسبوع اللي فات اتكلمنا عن قصة اليوجا من أول ما ابتدت لحد شكلها الحالي.. من ضمن الأجزاء المهمة اللي لازم نتكلم عنها هي مدارس اليوجا وأنواعها المختلفة تعالوا نتعرف سوا علي أشهرهم..
الاشتانجا
الاشتانجا هيّ من أشهر وأقدم أنواع اليوجا وبتعتمد في حركاتها علي تسلسل ديناميكي “حركي ” ومترتب. والنوع ده مهم جدًا في تنمية مرونة الجسم وقوته وتوازنه وتحمله وتحسين صحة القلب وده لاعتمادها على الحركات السريعة المتتالية وعشان كده بتحسن الصحة بشكل عام وبتعود الجسم على المجهود، ومع ممارستها بشكل مستمر الجسم بيتعود علي التحمل وبمعنى أصح مابيتعبش بسرعة خلال الجهد اليومي العادي وبتشمل طبعًا التنفس العميق بين كل وضعية.
والاشتانجا من أكتر أنواع اليوجا المعروفة بحرق السعرات برضه وأكتر أنواع اليوجا بتحسن الصحة النفسية والتخلص من الطاقة السلبية وتنشيط الطاقة في -بعض- الحالات المرضية لازم تستشير الدكتور قبل ممارسة اليوجا عمومًا والاشتانجا بشكل خاص لاعتمادها علي المجهود البدني.
هاثا يوجا
الهاثا نوع من أنواع اليوجا اللي بتعتمد على الفلسفة القديمة لليوجا واللي اتكلمنا عنها قبل كده ومن مبادئها
الزهد والانضباط وتوازن الجسم والعقل. الهاثا مختلفة عن الاشتانجا..
الهاثا يوجا بتعتمد علي التأمل والتنفس أكتر ما بتعتمد علي الأوضاع الجسدية المجهدة اللي بتحرق سعرات، وهدفها معنوي وروحاني أكتر من كونه بدني.. وده مش معناه إن الهاثا مافيهاش أوضاع جسدية بس اوضاعها بتُُمارس ببطئ وهدوء وثبات أكتر من انواع مختلفة في اليوجا.
الفينياسا يوجا
نوع من أشهر أنواع اليوجا.. الفينياسا بتعرفنا على نقاط القوة والضعف في جسمنا، ومن أنواع اليوجا اللي بتحرق سعرات برضه، بس ترتيب وتسلسل الحركات والأوضاع فيها حر وغير محدد.
الفينياسا بتتعمل في صورة أوضاع متتالية و غير متسلسلة أو مرتبة، فلسفتها في ربط الحركة بالتنفس ذكية جدًا وبمعني تاني هدفها التأمل الحركي ومناسبة جدًا للناس اللي حابه تنزل في وزنها أو تحسن من القوة والمرونة الجسديه
بتعتمد الفينياسا يوجا على ٣ مبادئ:
النفَس
تركيز النظر
واقفال العضلات
النفَس أو ‘البراناياما’ يعني ربط الحركة بالتنفس.. في أوضاع الفينياسا لازم تكون عارف امتى تاخد شهيق وامتى الزفير و ده بيتحسن بالممارسة.
تركيز النظر -‘درشتي’ بلغة اليوجا وبيكون على نقطة واحدة مريحه للعين وللرقبة بتساعدك كتير إنك تحافظ على توازنك الحركي في بعض أوضاع الفينياسا يوجا المتقدمة، واللي بتحتاج توازنات عالية.
اقفال العضلات أو ”الباندا” ودي من الحاجات الذكية جدًا واللي بتوصل الانسان لأنه يفهم جسمه؛ الجسم فيه اقفال عضلات كتير، فبتفهم إزاي تستخدم جسمك في عمل وضع معين وإزاي الجسم مكمل لبعضه وبيساعد بعضه زي ما الصورة موضحة.
آخر نوع وأحدثهم
الاكرويوجا نوع من أنواع اليوجا الحديثة شوية بقالها ١٤ سنه تقريبًا وأصلها بدأ من أمريكا للعالم كله
لعبة ”بهلوانية” مكونة من الاكروباتك واليوجا مع بعض.
النوع ده من اليوجا ذكية جدًا بتعتمد علي التوازن في الجسم والاتزان في شكل الحركة والتركيز بنسبة أكبر وبتحسن القوة الجسمية والمرونة والتوازن والثقة لممارسيها وفي منها أوضاع وحركات مركبة سهلة ممكن نجربها عادي ماتتخضوش.
