أول مرة اتعرفنا فيها على شخصية الكبير أوي، كانت سنة 2010 من خلال أول جزء من المسلسل. استمر النجاح وتوالت الأجزاء خلال السنين اللي فاتت. والمسلسل ده، ببيت المزريطة، بشخصيات المسلسل وديكوراته، وبكل حاجة فيه.. خليت الجمهور يتعلق بالمسلسل ومايشبعش من أجزائه.
ورغم غياب شخصية الكبير، جوني وحزلقوم لمدة 6 سنين، بعد بث الجزء الخامس من المسلسل سنة 2015.. دلوقتي أخيرًا هيرجعوا لشاشة التلفزيون من تاني في الكبير أوي الجزء السادس اللي من المقرر عرضه في سباق رمضان 2022!
بدأ مكي تصوير أولى مشاهد الجزء السادس لمسلسله الكبير أوي بعد انتهائه من بناء الديكورات والتحضيرات الأخيرة للعمل. وهيشارك فى بطولة المسلسل نفس نجوم الأجزاء اللي فاتت، منهم بيومى فؤاد وهشام إسماعيل ومحمد سلام. وفي أخبار متداولة بتقول إن أسماء أبو اليزيد هتشارك في بطولة المسلسل ده بعد انسحاب دنيا سمير غانم. وهيكون الجزء ده من تأليف مصطفى صقر، وإنتاج شركة سينرجى، وإخراج أحمد الجندي.
نشرت الفنانة ليلى عز العرب، عبر حسابها الشخصي على موقع التواصل الاجتماعي فيسبوك، صورة من كواليس تصوير مشاهدها في الجزء السادس من الكبير أوي، وعلقت “سام أم الكبير وجوني اليوم الأول في الموسم السادس”. أما هشام إسماعيل اللي بيقدم شخصية “فزاع”، فعبر عن سعادته الكبيرة لعودته للعمل بعد نجاحه اللي لسه مستمر لحد دلوقتي وإن الجمهور كان بيطالب بجزء جديد منه.
بالنسبه لناس كتير، المسلسل ده مش مجرد عمل كوميدي عادي. ولكنهم مرتبطين بيه بشكل كبير. بسبب الـ consistency اللي بنشوفها في الديكورات وحتى كمان الشخصيات وعلاقتهم ببعض. فعلاقة جوني بهجرس وفزاع، فعلًا في حتة تانية. وعلاقة الكبير ببيومي فؤاد.. وغيرها وغيرها من العلاقات الطريفة اللي بنشوفها في المسلسل، اللي مش بس بتضحكنا، ولكنها كمان بتخلينا نتعلق بالشخصيات والتفاصيل.