القضية 404: لأول مرة ذوي الهمم من مختلف البلاد العربية أبطال لعمل درامي

في الفترة الأخيرة شوفنا اهتمام كبير لذوي الاحتياجات الخاصة في مصر والبلاد العربية، زيّ استجابة الرئيس عبدالفتاح السيسي لطلب طفل من ذوي الهمم لتخصيص مادة كاملة في النظام التعليمي يعلم فيها المدرسين الأطفال احترام وكيفية التعامل مع ذوي القدرات الخاصة، وشوفنا كمان في الإمارات انطلاق حملة لطباعة الإرشادات والتعليمات للأدوية بطريقة “برايل” علشان يقدروا فاقدي البصر إنهم يجيبوا أدويتهم بنفسهم من غير مساعدة الآخرين.. وبعد ما شوفنا تطورات فرحتنا من ناس من ذوي الهمم اللي بقى من الطبيعي نشوفهم في مجالات زيّ المودلينج والإذاعة وكمان كمضيفات ومضيفين للطيران، دلوقتي الموضوع دخل للمجال الفني!

لأول مرة، هيتم عرض مسلسل في السباق الرمضاني القادم “القضية 404” واللي معظم أبطاله من ذوي الهمم من مختلف البلاد العربية.. وده خبر فعلًا يستحق إن إحنا نفتخر بيه.. المسلسل بيجمع بين قصص حقيقية مر بيها أبطال المسلسل، وأحداث تانية من وحي الخيال، وبيناقش قضايا التنمر والتهميش اللي بيعانوا منها في بعض الأوقات، وبيدخل الجمهور أكتر في عالم ذوي الاحتياجات اللي كتير مننا فاكر إنه يعرف كتير عنه بس الحقيقة إن إحنا نعرف مجرد نقطة من بحر العالم ده اللي بيجهل أغلبنا تفاصيله.

ووفقًا لصحيفة الجريدة، بطولة المسلسل من أبطال حقيقين، قدروا يعملوا إنجازات برغم التحديات في العالم الواقعي قبل ما يكونوا أبطال لعمل فني، ومنهم وهبة أسعد أول مضيفة طيران من أصحاب متلازمة داون، ومريم وجيه أول طالبة داون سندروم بكلية الفنون الجميلة، ويحيى عماد، أول الطلاب من أصحاب متلازمة داون بالمعهد العالي للباليه بأكاديمية الفنون، وسارة طه ممثلة مسرحية من قصار القامة، ومحمد حمدي أول مُتسلق جبال من أصحاب متلازمة داون، ومادونا أول ممثلة صماء وأول طالبة بالمعهد العالي للفنون المسرحية من ذوي الهمم.

💬"انا احلامي كتير مش بكتفي بحلم واحد" 🖍اميره حربي بطله من أبطال مسلسل “القضيه 404 “❤️بتعبر عن الروح الحلوه داخل كواليس المسلسلشكرا لأميره حربي ولاسره اميره في المسلسل صديقي/ محمد هشام والفنانه الجميله / مي فوزي عن دورهم المتميز في المسلسل معانا في قضيه 404 Amera Harby محمد هشام – Mohamed Heshamمي فوزي – Mai Fawzy#القضية_404#أول_مسلسل_في_الوطن_العربي_أبطاله_من_ذوي_القدرات_الخاصة#رمضان_٢٠٢١

Posted by ‎مسلسل القضيه 404‎ on Tuesday, March 30, 2021

المسلسل قصة وإخراج محمد الأنصاري، وسيناريو وحوار رامز عباس وهو كاتب أصم حب ينقل تجربته من خلال الكتابة علشان يتكلم عن واقع أصحاب الهمم في مصر بوجه خاص والوطن العربي بوجه عام.. وأغنية التتر من كلمات الشاعر خليل عز الدين مؤلف أغنية “فاضي شوية”.. وكتير من الفنانين العرب فرحوا بالعمل ده وأظهروا دعمهم للأبطال منهم الفنان تامر حسني اللي كان فخور بالعمل واتمنى لكل صُناعه النجاح.

اللي هيخلي المسلسل ده مميز عن أي عمل تاني مش بس لإن معظم أبطاله من ذوي الهمم ولكن كمان لإن كل بطل هيكون بيمثل تجربة حقيقية مر بيها بنفسه، وده اللي هيدي مصداقية للعمل والمشاهد ولإن كمان وأخيرًا ذوي الاحتياجات هيقدروا يقدموا الأدوار بنفسهم، من غير ما يقوم ممثل تاني بتقديم ده بالنيابة عنهم، اللي مهما كان ممثل شاطر مش هيقدر يجسد المواقف اللي بيمروا بيها زيهم. وده اللي هيدي الأمل لأي حد من ذوي الاحتياجات بعد كده، إنه يقدر ينمي شغفه للفن ويدخل المجال لإن بقى ليهم مكان.

🔰لينك التيك توك لمسلسل القضيه404وكل ما هو جديد عن تفاصيل ابطال المسلسل https://vm.tiktok.com/ZMeDLpJuP/ 🖍#القضيه_404📚#عالم_موازي 🌐

Posted by ‎مسلسل القضيه 404‎ on Monday, March 22, 2021

بدأت فكرة تقديم مسلسل من بطولة ذوي الهمم وقت تأسيس مبادرة “عالم موازي للفنون المعاصرة” واللي بتهدف لدمج الأشخاص من ذوي الاحتياجات في عالم الفن والميديا، وبدأت المبادرة بتحقيق ده لما أنتجت المبادرة أول كليب غنائي معظم أبطاله من ذوي الهمم سنة 2019.

آخر كلمة: المسلسل من الخطوات الكبيرة لتحقيق الدعم والاهتمام الكافي ليهم علشان يعيشوا الحياة الطبيعية اللي يستاهلوها..

تعليقات
Loading...
Tweet
Share
Share
Pin