الصيف قرب يخلص؟ دي الأماكن اللي هتخليك تحتفظ بشعور الصيف طول السنة

0

الشتاء علي الأبواب، وعلي الرغم من درجات الحرارة العالية اللي حاسين بيها الفترة دي، الصيف هيخلص بشكل رسمي كمان كام أسبوع. ولو إنتم من الناس اللي في “فريق الصيف” ومتضايقين من فكرة إنه قرب يخلص، فدي بعض الأماكن اللي هتخليكم تستمتعوا بأطول قدر ممكن من أشعة الشمس حتي بعد ما الشتاء يهل.

دهب

عن: CNN

دهب من أدفى وأجمل الأماكن اللي مش بس المصريين بيحبوا يقضوا وقتهم فيها، ودايمًا بتلاقي البلد مليانة بالأجانب اللي بيجوا من آخر الدنيا بس علشان يستمتعوا بأشعة الشمس الدافئه هناك. ولو إنت من الناس اللي بتحب الطبيعة، والبحر، والجو الدافي وعايز تفضل حاسس بال “summer vibes” أكيد عرفت دلوقتي لازم تروح فين في الشتاء!

سيوة

عن: Travilio

سيوة هي المكان اللي هتضمن إنه يدفي جسمك وقلبك كمان. بالرملة الناعمة والشمس الصافية وهي بتحضن البحيرات اللي موجودة، وهو الصيف إيه أكتر من كده؟

نويبع

نويبع من البلاد اللي مش واخدة حقها بالرغم من إن فيها كنوز طبيعية ومناظر خلابة، ده غير الشمس اللي أحيانًا بتبقي قوية بزيادة، بس هو ده اللي إحنا بندور عليه أصلًا صح؟

سهل حشيش

مفيش أروق من سهل حشيش علشان الواحد يستغل الشمس والرملة والهدوء، علشان ياخد أطول وقت ممكن تحت أشعة الشمس ويستمتع وهو بيحط ال”tanning oil” بتاعه ولا كـأنه في أحر أيام أغسطس!

أسوان

معظم الناس اللي بتروح أسوان بتاخد “كروز” وسط النيل، ويا سلام بقي لو طلعت علي سطح المركب واتشمست شوية وإنت ماسك مشروبك المفضل في إيديك وفي موسيقي هادئة شغالة في الخلفية. في أحلي من كده؟

آخر كلمة: طعم المصيف ممكن تحس بيه في أي وقت في السنة وإنت في الأماكن دي!

تعليقات
Loading...