الشتاء ماينفعش من غيرها.. أكلات شتوية مشهورة في البلاد العربية

في برد الشتاء وقعدتنا في البيت، والنفس المفتوحة على الأكل، بنبقى بندور على أكلات تدفينا وتخلي جسمنا يحافظ على حرارته، وإحنا في البلاد العربية بالذات مشهورين بحبنا واهتمامنا بالأكل، وعندنا عادات خاصة بالأكل في كل موسم، خصوصًا في فصل الشتاء، كل بلد عربية عندها أكل وشوربة مميزة للشتاء بتواجه بيها برودة الجو، فتعالوا نشوف إيه أشهر الأكلات الشتوية في الوطن العربي.

شوربة العدس

عن: just food

يعتبر أشهر طبق مصري لمواجهة برد الشتاء، ومكوناته بسيطة وعلى قد الإيد، علشان كده متاحة لكل طبقات الشعب ومحبوبة للكل، بتتعمل بطريقة سهلة، ومكونات كلها مفيدة وصحية، من الخضار والعدس، هتجيب حبة بطاطس وحبة طماطم وجزرة وبصلة، وتقطعهم كلهم مكعبات، وفص توم، وكوباية ونص عدس أصفر، هتحط البطاطس، والجزر، والطماطم، والبصل، والتوم والعدس في إناء كبير على النار مع كوبايتين مياه ومرقة، ولما تستوي المكونات، هناخدها نضربها في الخلاط، وفي طاسة تانية، هنقطع بصلة في معلقتين زيت ونعمل تقلية، نضيفها على الشوربة.

العصيدة السعودية

عن: هي

من أشهر الأكلات السعودية في الشتاء، وبتعتمد بشكل أساسي على التمر اللي في الأصل بتشتهر بيه السعودية، بتتعمل بالتمر والسمن البلدي، اللي بيمدوا الجسم بالطاقة والدفاء، وبتتعمل بطريقة سهلة، بنجيب التمر ونحطه مع شوية مياه في الخلاط لحد ما يتجانسوا، بعدين نحط الخليط على نار هادية، ونضيفله الدقيق والزبدة ونسيبهم يتغلوا، وبعدها نخلطهم بالمضرب اليدوي كل شوية لحد ما يبقى عجينة، وبعدين نحط التوابل، زي الملح والفلفل والزعفران.

الدولمة

تعتبر أشهر الأكلات الشتوية في العراق، وطريقة تحضيرها سهلة، وهي بالمصري الورق عنب، لكن في العراق بيتعمل باللحمة ودبس الرمان.

الكرك

شاي الكرك مشروب مشهور جدًا في الإمارات، وليه طقوس جميلة زي إنك تجيبه تشربه على البحر وهيدفيك، بيتعمل بطريقة سهلة ونكهته مميزة، في إبريق على حرارة متوسطة، بنحط الكرك ونضيف المياه المغلية، ونزود السكر ونسيبه 5 دقايق لحد ما يغلي، ونضيف شوية قرنفل وقرفة وزعفران، ونسيب الميكس ده يتخلط مع بعضه.‏

طنجية مراكشية

من أشهر الأكلات المغربية اللي بيواجهوا بيها برد الشتاء، دسمة وغنية، وطريقته بسيطة، بنحط زيت زيتون في إناء على النار، ونضيف توم، ونحرك على نار متوسطة لمدة 3 دقايق، ونضيف اللحم الضاني، والتوابل اللي بتحبها، وليمون مخلل، ونحرك لحد ما المكونات تختلط، ونضيف الطماطم المفرومة وكرات البطاطس المقلية، والسمنة والمياه ونحرك وبعدين نغطي الإناء ونسيبه على نار متوسطة لمدة ساعة.

المجدرة

من أشهر الأكلات في فلسطين، وبتتعمل بطريقة بسيطة، بنخلط البصل والبهارات وكمون والقرفة ويتشوحوا مع العدس وملح وفلفل، ونضيف الرز والمرقة، ونسيبه 25 دقيقة لحد ما يستوي خالص، وبعد كده بتكون جاهزة للتقديم.

آخر كلمة: ماتفوتوش قراءة: استخدامات مش معروفة للميكروويف هتسهل عليك مهمات في المطبخ

تعليقات
Loading...
Tweet
Share
Share
Pin