السفارة المصرية في نيوزيلندا تفتتح أول حديقة فرعونية ضمن حدائق هاميلتون

واحد من أهم مناطق جذب السياح والزوار في نيوزيلندا هي حديقة مدينة هاميلتون العامة، واللي بتوفر مجموعة متنوعة من الحدائق والمناطق الخضراء اللي بتجذب حوالي مليون زائر كل سنة.

جزء مهم من الحديقة العامة اللي بتنتشر على مساحة 54 هكتر هو مجموعة الحدائق اللي بيتميز كل منها بطابع خاص، وأجدد الحدائق ذات الطابع الخاص في هاميلتون هي الحديقة اللي افتتحتها السفارة المصرية في نيوزيلندا يوم الاتنين اللي فات، واللي تعتبر أول مشروع في العالم لإعادة خلق حديقة فرعونية من العصور المصرية الوسطى، واللي ترجع وسائل زراعة الحدائق والبستنة فيها لحوالي 4000 سنة.

عن: stuff

الحديقة الفرعونية هي واحدة من 18 حديقة فريدة في حديقة هاميلتون بتحكي تاريخ البستنة وزراعة الحدائق في الحضارات المختلفة على مدار التاريخ، وتم تصميمها على شكل حديقة معبد تقليدية من عصر المملكة المصرية الوسطى من 2040 لـ 1782 قبل الميلاد.

رغم إن علماء الآثار يعرفوا معلومات كتير جدًا عن البستنة في مصر، إلا إن الحديقة الفرعونية في هاميلتون تعتبر أول حديقة من النوع ده يتم إعادة خلقها في العصر الحديث.

بتتكون الحديقة من معبد بجدران مزينة بالرسومات الهيروغليفية واللي أتعملت بشكل يحاكي واقع جدران المعابد قبل 4000 سنة بألوان زاهية جدًا. رغم إن معظم الألوان اللي كانت موجودة على جدران المعابد المصرية القديمة بهتت النهارده، إلا إن علماء الآثار المصرية بيأكدوا إن بقايا الألوان تثبت إنها كانت شديدة الزهو في وقتها.

الحدائق الشاسعة ذات الجمال المبهر دي كانت ممنوعة على عامة المصريين ومش بيدخلها غير الملك والكهنة، وكل مكوناتها من زخارف وكتابات ونباتات كانت مصممة لممارسة شعائر الموت والانتقال للحياة الآخرة. كانت بتمثل الحدائق من النوع ده رمز لقوة الملك في العصور القديمة ومصدر لإسعاد الآلهة ونيل رضاهم وإبهارهم بقدرات الإنسان المصري على خلق الجمال.

الحديقة الفرعونية، اللي مساحتها 750 متر، في وسطها بركة مياه مستطيلة وحواليها مجموعة من النباتات المصرية الأصيلة، وبيقول المسئولين عن تصميم الحديقة إن بركة المياه الأصلية كانت مساحتها الواقعية ضخمة لدرجة إن عشرين راجل كانوا بيجدفوا بمركب الملك علشان يفسحوه في البركة اللي مساحتها الواقعية تساوي عشر أضعاف مساحة البركة الموجودة النهارده في حديقة هاميلتون.

استعان المصممين بتوع الحديقة الفرعونية بعلماء المصريات علشان يحققوا أكبر قدر من الأصالة والواقعية في تصميم الحديقة المصرية القديمة اللي بدأ بناءها في 2018 وتم افتتاحها للزوار يوم الاتنين اللي فات.

أخر كلمة: ماتفوتوش قراءة: ناقلة البترول صافر: قنبلة موقوتة على سواحل البحر الأحمر تُحذر بأزمة بيئية قريبة

تعليقات
Loading...
Tweet
Share
Share
Pin