خناقة جديدة لذيذة متربعة على العرش للسنة التانية أو التالتة على التوالي تقريبًا، ولو أنت بتتخانقها من بدري مش مشكلة، ورغم إنها شغالة من بدري مش لسه جديدة، موسم الصيف ده بتشهد تدخلات جديدة ومقارنات أجدد، تقريبًا علشان الساحل الطيب والساحل الشرير كل واحد منهم بينافس بشكل أقوى لكنهم مش بينافسوا بعض، كل واحد فيهم بيعلّي على نفسه. إيه هو الساحل الطيب وإيه الساحل الشرير لو أنت مش متابع الموضوع؟ هنمشي معاك واحدة واحدة ومن الأول.
الساحل توب المصايف
الساحل الشمالي بقاله سنين متربع على عرش المصايف في مصر.. لكن مفهوم “الساحل” بيتغير كل شوية، فاكر فيلم “طير أنت”؟ من 2009 وفي فورمة ساحل وعيال بتسمع مزيكا كلها “إتس إتس” ودي قمة الروشنة، وابتدى المفهوم ده يكبر ويتطور ويتوسع كمان بأماكن كتير وقرى أكتر، كل ما واحدة فيهم تبقى “موضة قديمة” نلاقي الأجدد والأحدث، واللي بتجذب الناس بطريقة أجدد وأروش، لحد ما بقى عندنا ساحل طيب وساحل شرير، زيّ ما الناس بتقول.
الساحل الطيب من وجهة نظرهم هو الساحل القديم، مارينا ومراقيا والقرى القديمة اللي الناس واخدة شاليهات فيها من زمان.. أما الساحل الشرير هو الأماكن الجديدة واللي غالبًا أسعارها بتبقى خرافية، وكل صيف تقريبًا بيكون في افتتاح لأماكن جديدة، واللي بتاخد الاهتمام علشان دايمًا الناس بتحب تجرب.
أجواء الساحل الطيب
في الساحل الطيب، روايح الزمن الجميل إلى حد ما، واخد كتير من مصايف زمان، يعني تنزل البحر وترجع تاكل سنودتشات البانيه بالرملة، أو المكرونة، وتاخد دوش وتفرد جسمك في البلكونة كده ويا سلام لو راحت عليك نومة، بتحس إنك نايم في السحاب.. تصحى تنزل تتمشى مع أهلك، تجيبوا حاجة حلوة، أقصى متعة أو قلق ممكن تعمله إنكم تركبوا عجل بالليل أو تقعدوا في كافيه، أو تطبوا فطاير، أو الصبح تعملوا حفلة شوي، اللي في الساحل الشرير ممكن يبقى اسمها باربكيو على لهب هوى بيروت.
الناس شايفة إن الساحل الطيب لحد دلوقتي له مزايا مش لاقيينها في الجانب الآخر من المصايف، ويمكن ليهم وجهة نظر أعمق شوية، وهي إنك بيكون عندك خصوصية أكتر، ماحدش مهتم -نسبيًا- بشكلك ولا بسعر المايوه اللي أنت لابسه ولا بالسيكس باكس أو الكرش اللي عندك، مش محتاج تقعد طول الشتاء تجهز في فورمة علشان تكون أجمد واحد على الشط.. مش محتاج يبقى ليك خطة معينة لليوم تمشي بيها مع شلة ناس قد كده ممكن تبقى ماتعرفش منهم غير اتنين والباقي ماتفهمش اتجمعوا ازاي، شايفين في الساحل الطيب إنه محتفظ بشوية قيم كده بعيد عن حداثة السوشيال ميديا وصور إنستجرام.
غير شوية إيجابيات جغرافية، زيّ إن الشواطئ مافيهاش صخور، تقدر تبلبط بحرية أكتر، والأهم بقى، إن مفيش زحمة ومش محتاج تقف بالساعات في طوابير علشان تجيب أي حاجة تاكلها أو تشربها، ومش محتاج تحجز في مكان تقعد فيه قبلها بأربع سنين ضوئية.
أجواء الساحل الشرير
نيجي بقى للجانب الآخر، الساحل الشرير -زيّ ما الناس في الخناقة الأزلية بتقول احنا مالناش دعوة- فيه كل حاجة جديدة، يعني أكيد مفيش حد فينا من جواه كده مابيبقاش عايز يشوف كل حاجة جديدة ويبقى حاسس إنه متابع وموجود وسط الحدث، وبيشارك كمان، أحدث كل حاجة، حفلات لنجوم كتير بيهتموا يعملوا جدول طول شهور الصيف في أماكن مختلفة في الساحل، أماكن سهر زيّ ما قال عمرو دياب، كل الاختراعات والصور وإنستجرام والبلوجرز والستوريز الروشة.
ومش علشان اسمه “ساحل شرير” يبقى مالوش مميزات، أكيد لأ، هي بس تفضيلات شخصية، يعني طبعًا فكرة إنك تهتم بجسمك وتعمل فورمة وتحب يبقى جسمك له شكل معين دي حاجة كويسة، إنك بتحب تهتم بمظهرك في كل الأوقات وتنسق لبس معين حتى لو خارج البلكونة، برضه دي أذواق ومش من حق حد يحجر على رأي التاني، لو بتحب تكون في شاطئ خاص علشان تحس بالخصوصية أكتر برضه ده حقك، ولو بتحب تاكل أكل صحي دايمًا وتهتم بكل تفاصيل وجبتك وعايزها من مكان معين، دي كمان حاجة جميلة، فلو دي تفضيلاتك الشخصية هتكون وجهتك المفضلة هي الساحل الشرير.
ملحوظة في المقارنة: في الساحل الشرير مفيش حاجة اسمها قرى، في كمباوند، ولو أتكلمنا في مقارنة الأسامي هناخد وقت، بس باختصار، المسميات هنا وهنا مختلفين 180 درجة، لو أنت أول مرة تروح الساحل الشرير لازم تذاكر، ولو أنت أول مرة تروح الساحل الطيب برضه لازم تذاكر.