التمكين ضد التحرش الجنسي: مني زكي تدعو لحضور محاضرة Safe لحماية الأطفال

مشكلة التحرش الجنسي ضد الاطفال موجودة من زمان، لكن للاسف كتير من الناس بيخافوا يتكلموا عنها بحكم إنها من المواضيع “المحظورة” بين الأهالي، وبيشوفوا ساعات إنه عيب نتكلم عنها، ونفتح عين الاطفال علي مواضيع زي دي من صغرهم.

لكن شوية بشوية ابتدي الفكر والثقافة دي تتغير، والكلام والوعي عنها يزيد. ودلوقتي منظمة “Safe” الغير هادفة للربح قررت تعمل محاضرة مدتها 90 دقيقة عن التحرش الجنسي للاطفال، وإزاي يقدر الطفل يحمي نفسه لو لقي نفسه في موقف زي ده. ميعاد المحاضرة هيكون 16 من سبتمبر الجاري والمكان هيكون في ساقية الصاوي.

ودعمت مني زكي المبادرة دي بشدة، ودعت الناس إنهم يحضروها على صفحتها الرسمية على الإنستجرام، ووضحت أهمية تثقيف الأطفال عن مواضيع زي دي علشان يقدروا يواجهوا أي موقف ممكن يتعرضوا ليه في المستقبل. وأكدت على أهمية دور الأهل في إنهم يحموا أولادهم من سن صغير عن طريق قراءة بعض كتب التوعية المناسبة ليهم زي ما هي بتعمل مع أولادها، واللي قالت إنها ساعدتها كتير في إنها توصلهم الموضوع بطريقة بسيطة وسريعة.

آخر كلمة: لازم ننشر الوعي تجاه التحرش الجنسي ضد الأطفال!

تعليقات
Loading...
Tweet
Share
Share
Pin