إليسا عملت مبادرة لمساعدة السيدات للكشف المبكر عن سرطان الثدي

بما إن أكتوبر هو شهر التوعية بسرطان الثدي، بنلاقي مشاهير كتير بيطلعوا على السوشيال ميديا بيشجعوا الستات علشان يهتموا بالكشف المبكر لإنه بيساهم بنسبة كبيرة في تسريع العلاج وبيزود في فرص الشفاء بنسبة ممكن توصل لـ98%، ومن ضمن الفنانين اللي كان لهم دور في زيادة الوعي الفنانة إليسا.

وده بعد ما كتبت على صفحتها على تويتر بالتزامن مع حملات التوعية، وأعلنت عن مبادرة إنسانية هدفها الأول هو زيادة الوعي ومساندة الستات في تحمل تكاليف إجراء الفحوصات اللي ليها علاقة بالكشف عن المرض، وده لإن الظروف الصعبة اللي بتمر بيها لبنان على كل المستويات خلت في أزمة على المدى الطويل وأثرت على حاجات كتير خلت حتى من الصعب على بعض الأسر إنهم يوفروا حتى احتياجاتهم الأساسية من أكل وشرب، وبالتالي أي حاجة تانية هيعتبروها رفاهيات في حياتهم.

إليسا كان لها تجربة قبل كده مع مرض السرطان وكان برضه سرطان في الثدي سنة 2016، وبرغم الظروف الصعبة اللي مرت بيها من عملية استئصال للورم وعلاج بالأشعة، وتبعات مابعد العلاج، بس كانت طاقة أمل وحياة لكل اللي حوليها، ولسه بتوزع الطاقة والروح دي على كل محاربين المرض، وموخرًا أطلقت خط مجوهرات كل أرباحه مخصصة لمرضى ومحاربين السرطان.

أخر كلمة: ماتفوتوش قراءة: في عيد ميلادها، 10 معلومات ماتعرفوهاش عن ملكة الإحساس إليسا

تعليقات
Loading...
Tweet
Share
Share
Pin