بعد ما رفعت مصر حظر التجول وخففت الإجراءات الاحترازية ضد فيروس الكورونا، ابتدت الحياة ترجع لطبيعتها، وزي ما أثرت الكورونا على حياتنا كلنا، الأيس كريم كمان ناله جانب من التأثير بس بشكل مبتكر ولطيف.
ابتكر صاحب محل للحلويات في منطقة الجيزة أيس كريم جديد على شكل فيروس الكورونا، والأيس كريم ده بيتقدم للزبائن في شكل مستدير ومتاح بألوان وأطعمة مختلفة، ومتزين بأعواد من الشيكولاتة، والبسكوت، وقطع السكر الملونة، والأعواد دي بتدي شكل زي الأشكواك اللي بتغطي الطبقة الخارجية للفيروس في صورته المجهرية.
بيتمنى المسؤلين عن المحل إن ابتكارهم يساعد في تهدئة مخاوف الناس وحالة الهلع المنتشرة بسبب الكورونا، وقالوا إن بعض زباينهم مرتاحوش لشكل المنتج الجديد في البداية، بس بعد ما تذوقوه غيروا رأيهم على طول وعجبهم طعمه. وهما بردوا بيهدفوا لتعريف الناس بإهمية اتباع الإجراءات الاحترازية، وإدخال البهجة على قلوبهم بعد شهور من العزلة والخوف.
عدى ست شهور من أول إعلان الصين عن وجود حالات إصابة بفيروس الكورونا Covid-19، ومن وقتها لحد دلوقتي قدر الفيروس الجديد إنه يصيب الملايين حول العالم، وياخد حياة أكتر من 500 ألف شخص. وبالرغم من إنه لسة مفيش علاج أو لقاح واضح وفعال ضده، أعداد الإصابة بيه بتقل والمصابين بيتم شفائهم حالياً بمعدلات أكبر، وابتدى العالم ينفتح من جديد. وفي الآخر نقدر نقول إن الأزمة دي وريتنا جوانب مشرقة كتيرة في حياتنا زي إننا شوفنا ابتكارات ومواقف إنسانية كتيرة عمرها ما كانت هتظهر في الظروف الطبيعية.