أول يوم في السنة الجديدة: قرارات لازم نسعى لتحقيقها

القرارات للسنة الجديدة كل الناس بتاخدها في لحظة حماس، ومن أول السنة هبقى شخص تاني خالص وهغير حياتي كلها للأحسن وكل الكلام الجميل اللي بنفضل نقوله ده، وطبعًا معظمه -إن ماكانش كله- بيتبخر ويروح في الهوا ونرجع زي ما كنا، لكن كمان الناس في العموم بتتفائل بإنها تاخد قرارات وتغير حياتها في بدايات، خصوصًا السنة دي بادئة يوم سبت، فعندك كده أول يوم في الأسبوع، بأول يوم في السنة الجديدة، يعني مالكش حجة أهو لو أنت بتحب تبدأ في تنفيذ قراراتك في بدايات جديدة.

وعلشان الهزار في الموضوع ده كتر لدرجة إننا فعلًا بنستسلم وننسى إننا أخدنا قرارات مهمة في حياتنا، عايزين نفكر نفسنا ونفكر بعض بقرارات لازم نحافظ على سعينا لتحقيقها في السنة الجديدة، لإنها هتفرق في حياتنا حتى لو بشكل بسيط، حتى لو مش بتعتبر تغيير للعالم، بس هتغير حياتنا للأحسن. وعلشان نقدر نحققها، لازم نبتدي بالحاجات الصغيرة اللي تساعدنا نبقى متفائلين، لكن هنبدأ بخطط خزعبلية؟ مش هنحقق حاجة خالص.

  • نلتزم بـ healty lifestyle
عن: mi-hub

طبعًا أول وأشهر القرارات بيكون الجيم والدايت، من أول السنة هروح الجيم وابتدي دايت قاسي واخس النص وأتمرن علشان العضلات، كل الكلام الجميل ده اللي بننساه طبعًا مع أول يوم في السنة. لكن علشان فعلًا نبتدي في تحقيق قرار تغيير شكلنا وجسمنا للأحسن علشان صحتنا، الموضوع مش هيجي باللي اتقال في أول جملة ده خالص.. لازن نبتدي بخطوة إن يكون شكل حياتنا نفسه صحي، ناكل أكل كويس وصحي ونضيف ونبطل رمرمة، ناخد بالنا من صحتنا بتمارين ورياضة (مش علشان تخلي جسمك زي بيج رامي) لكن علشان يبقى ليك أسلوب حياة صحي بشكل عام.

  • نتعلم مهارات جديدة

من إننا نجرب نتعلم لغة جديدة، أو نقوي ونحسن مهاراتنا في لغة ابتدينا فعلًا نتعلمها قبل كده، نتعلم حاجة جديدة في مجال شغلنا أو دراستنا، أو حتى نقرر نتعلم حاجة جديدة بعيدة خالص عن مجالنا، أي حاجة بتتعلمها هتفيدك سواء قريبة من مجالك أو لا، علشان كده لازم نسعى إننا نتعلم مهارات جديدة في السنة، علشان حرام سنة كاملة تعدي من غير ما نكون اتعلمنا ولو مهارة واحدة جديدة.

  • نكون ألطف مع العالم

مع الناس اللي حوالينا، اهلنا وأصحابنا، مع الحيوانات حتى اللي بنقابلهم في الشارع، مع كوكب الأرض نفسه بكل حاجة فيه ماشيين نخربها، في السنة الجديدة لازم نحاول نكون أشخاص ألطف مع كل حاجة حوالينا، علشان الحياة لوحدها صعبة، مش مستاهلة كمان نصعبها على نفسنا وعلى غيرنا.

  • البعد عن السلبية

أيًا كان شكلها في حياتك، من أحسن القرارات اللي ممكن تنفذها إنك تبعد عن الأفكار السلبية أو حتى التركيز فيها لوحدها، أكيد مش كل حاجة بمبى ولا الدنيا كلها جميلة، ويمكن يكون فعلًا المعادلة حتى مش ماشية بالمناصفة بين الإيجابية والسلبية، حتى لو السلبيات أكتر، لكن التركيز فيها لوحدها هيمنعك إنك تحقق أي حاجة، جرب تشوف أي حاجة إيجابية حواليك مهما كانت صغيرة، عوّد نفسك إن عينك تشوف الحلو كمان قبل الوحش، وإن تفكيرك نفسه يحاول يلاقي زاوية كويسة في أي حاجة قدامك.

  • نجرب حاجات جديدة

غير القرارات الكبيرة زي إن هنجرب نسوق طيارة والكلام ده، أي حاجة مهما كانت صغيرة كان نفسك تجربها، حتى لو أكلة جديدة، احساس إنك بتجرب حاجات جديدة هيخليك متحمس تحقق انجازات كتير، ويحسسك إن السنة ماراحتش على الفاضي، جرب تسافر مكان مازورتوش قبل كده، أو جرب حتى أماكن في نفس محافظتك، أو حتى تجرب ستايل جديد في لبسك.

آخر كلمة: قولنا إيه القرارات اللي نفسك تنفذها في 2022؟

تعليقات
Loading...
Tweet
Share
Share
Pin