في بعض الفنانين في الوسط الفني، بيبقى معروف على طول إنهم يقربوا لبعض، زيّ مثلًا سعاد حسني ونجاة الصغيرة، والأخوات ميس حمدان ومي سليم ودانا حمدان.. ولكن في فنانين وفنانات كتير من الوسط الفني، بيبقى في بينهم صلة قرابة أو نسب، ولكن لسبب ما مش بيبقى معروف أوي عند الكتير إن في رابط عائلي بينهم، إما لتغيير البعض لأساميهم العائلية فالناس مش بتاخد بالها، أو لعدم ظهورهم كتير في الساحة مع بعض.. وبعد ما بيكون مر وقت طويل، بنتفاجىء أحيانًا من خلال لقاءات تليفزيونية أو غيرها، إن في بعض الفنانين بتجمعهم صلة الدم.. فتعالوا نشوف بعض النجوم في الوسط الفني، اللي في صلة قرابة بينهم وبين البعض.
نيللي وفيروز ولبلبة
انتوا عارفين إن الفنانة نيللي بتكون أخت الطفلة المعجزة فيروز، وهما الاتنين بنات خالة الفنانة القديرة لبلبة؟ حطينا الصور كلها بالأبيض والأسود علشان تقدروا تاخدوا بالكم من التشابه الكبير اللي بينهم هما التلاتة.
شريهان وعمر خورشيد
خبر صادم مش كده؟ رغم شهرة الفنانة الكبيرة شريهان والموسيقار العظيم عمر خورشيد، لكن ناس قليلة جدًا اللي يعرفوا إن الاتنين أشقاء.
شمس البارودي وريم البارودي وغادة عادل
شمس البارودي بتكون ابنة عم والد ريم البارودي، وبما إن غادة عادل ابنة أخت شمس البارودي برضه، يبقى ده يخلي غادة عادل وريم البارودي أقارب ومن درجة قريبة كمان.
هدى رمزي وشريف رمزي وصلاح ذو الفقار
ممكن يكونوا ناس كتير عارفين إن شريف رمزي جاي من عائلة فنية من العيار التقيل، لإن والده المنتج محمد حسن رمزي، ولكن انتوا عارفين إن عمته هي الفنانة المعتزلة هدى رمزي وكمان جده يبقى الفنان الكبير صلاح ذو الفقار؟
ناهد السباعي ورانيا فريد شوقي وداليا البحيري
هنا الموضوع ملخبط شوية وكبير، فحاولوا تركزوا معانا.. ناهد السباعي هي حفيدة فريد شوقي، وبالتالي رانيا فريد شوقي بتكون خالتها.. أما بالنسبة لداليا البحيري فهي كانت متزوجة من الراحل فريد المرشدي أخو ناهد السباعي.. وبالتالي ناهد تبقى عمة أولاد داليا البحيري.. وبكده يبقى في نسب بيربط بين التلات فنانات.
مي عز الدين وزبيدة ثروت
بعد سنين طويلة من ظهور الفنانة مي عز الدين كنجمة صف أول، بدأ كتير من المواقع الأخبارية تتداول معلومة بتقول إن مى هي حفيدة الفنانة الكبيرة زبيدة ثروت، لكنها ماحبتش تصرح بده في بداية ظهورها علشان تتعرف وتتشهر بأعمالها بس .. ولكن إلى الآن مفيش تصريح واضح من مى بتقول فيه نصًا إنها حفيدتها. ولكنها دايمًا بتعبر عن حبها الكبير للفنانة زبيدة وإنها ممثلتها المفضلة، وكمان كانت الفنانة زبيدة ثروت صرحت قبل كدة إن مى من الفنانات المميزين جدًا بالنسبة لها، وإنها الشخص اللي شايفاه مناسب إنه يقدم سيرتها الذاتية في يوم من الأيام.. وفي أحد المهرجانات، ظهرت مي لابسة فستان مطبوع عليه صور الفنانة الراحلة زبيدة.
عن: شرقية توداي 
عن: مجلة هى
أحمد سعيد عبد الغني وزهرة العلا
طبعًا معروف إن أحمد سعيد عبد الغني هو ابن الفنان الكبير سعيد عبد الغني، ولكن اللي كتير مننا مايعرفهوش، هو إن خالة أحمد عبد الغني هي الفنانة الراحلة زهرة العلا، اللي كان في شبه كبير بينها وبين شقيقتها، والدة أحمد عبد الغني.
عامر منيب وماري منيب
رغم وجود نفس اسم العائلة، أكيد ماكناش نتخيل إنهم فعلًا من نفس العائلة! فماري منيب تبقى جدة الفنان الجميل الراحل عامر منيب.