بكل أسف رمضان خلاص فاضل له أيام وينتهي، وتنتهي معاه مسلسلات رمضان اللي استمتعنا بيها واتعلقنا بحلقاتها خلال الأسابيع اللي فاتت. بس كمان العيد داخل علينا بزهوته وفرحته اللي بتيجي معاه واحنا بنشرب بق المياه بعد آذان الفجر، وكوباية الشاي بلبن والبسكوت اللي بنبقى مستنينها من أول يوم رمضان، والفطار الملوكي اللي بيبقى فيه كل الأكلات اللي ماكانش ينفع ناكلها أثناء الصيام.. ومرواح السينما وحضور أفلام عيد الفطر!
وبمناسبة أفلام العيد، برغم الظروف الصعبة اللي بنمر بيها والحظر بسبب ارتفاع حالات الإصابة بفيروس كورونا، لكن برضه قدر بعض صناع السينما إنهم يقدموا أعمال للمشاهدين علشان مانشوفش صالات السينما فاضية في أيام العيد. فهيتم عرض بعض الأفلام الجديدة، مع الالتزام بالقرارات الجديدة وغلق صالات العرض الساعة 9 مساءً والالتزام بالتباعد الاجتماعي ، للحد من انتشار فيروس كورونا. فتعالوا نشوف مين من الفنانين والفنانات اللي هنشوفهم على شاشات السينما في أيام عيد الفطر.
ديدو
فيلم كوميدي من بطولة كريم فهمي وبيومي فؤاد وحمدي الميرغني وأحمد فتحي، اللي بنشوف فيه كريم فهمي وهو بيقرر يسرق عالم غني مع أصحابه، ولما بيفشلوا في سرقته بيحولهم العالم ده لعقلات أصابع وبنتابع بعد كده إيه اللي بيحصلهم.
ثانية واحدة
فيلم كوميدي تاني من بطولة دينا الشربيني ومصطفى خاطر وأحمد الفيشاوي وسوسن بدر وبيومي فؤاد.
أحمد نوتردام
فيلم من بطولة رامز جلال وغادة عادل وخالد الصاوي وبيومي فؤاد، وبنشوف في البرومو جرائم قتل واختطاف بتتم في إطار كوميدي على إيد قاتل متأثر بشخصية أحدب نوتردام.
أما عن الأفلام اللي من المفترض إنها تنزل قريبًا ولكننا مش متأكدين إذا كانت هتنزل في عيد الفطر ولا هتتأخر شوية هما..
مش أنا
من كام يوم نزل تامر حسني بوستر لفيلمه الجديد مش أنا اللي بيشاركه فيه البطولة ماجد الكدواني وحلا شيحة وسوسن بدر، ولكنه لسه ماحددش ميعاد عرض الفيلم في صالات السينما.
الإنس والنمس
من فترة النجم محمد هنيدي نزل بوسترات فيلمه الجديد الإنس والنمس من بطولته مع منة شلبي وصابرين وبيومي فؤاد، واكتفى إنه يقول إننا هنشوف الفيلم “قريبًا”. فهل هيكوم ضمن أفلام عيد الفطر، ولا لسه هنستنى شوية كمان؟