عمر الشريف قدر إنه يحفر اسمه في تاريخ السينما العالمية.. وزيّ ما أبدع في الأفلام اللي شوفناها وحبيناها زيّ “صراع في الوادي” و”نهر الحب” و”في بيتنا رجل” وغيرها من الأفلام المصرية، كمان أبدع وساب بصمته في السينما العالمية ولقبوه بـ”لورانس العرب”.
لورانس العرب – Lawrence of Arabia
أول أفلام عمر الشريف في طريق العالمية، وهو فيلم درامي ملحمي مستوحى من حياة “توماس إدوارد لورانس” وكتابه اللي صدر باسم “أعمدة الحكمة السبعة”. الفيلم بيتكلم عن ظابط بريطاني اتعرف بذكائه الشديد وكان من ضمن القوات الإنجليزية الموجودة في مصر في الحرب العالمية، اتبعت للصحراء العربية بأوامر من السلطات البريطانية علشان يساعد الملك فيصل والشريف الحسين بن علي، اللي بيلعب دوره عمر الشريف، في حربهم مع الأتراك وتحرير جزيرة العرب.
عمر ماكنش النجم العربي الوحيد اللي في الفيلم، كان معاه الفنان جميل راتب، وبحسب تصريحات الماكيير محمد شعوب، عمر الشريف ماكانش هو المرشح الأول للفيلم ولكن كان رشدي أباظة خصوصًا إنه كان بيتكلم خمس لغات. وفي عرض فيلم “في بيتنا رجل” كان رايح ديفيد لين المخرج البريطاني علشان يتفرج على أداء رشدي أباظة في الفيلم واللي كان بيشاركه في بطولته عمر الشريف، بس المفاجأة إن المخرج أعجب بملامح عمر الشريف وفي وقتها عرض عليه فيلم “Lawrence of Arabia”وطلب منه يعمل عملية علشان يشيل الحسنة اللي في وشه، ودي كانت البداية لعمر في طريق هوليود. الفيلم تم إنتاجه سنة 1962، وتم تصنيفه في المرتبة الخامسة ضمن أفضل 100 فيلم في السينما الأمريكية في القرن العشرين. وأخد عمر الشريف عليه جائزة “جولدن جلوب” كممثل صاعد واترشح لجائزة “الأوسكار” لأفضل ممثل مساعد عن نفس الفيلم.
دكتور جيفاجو – Doctor Zhivago
الفيلم اتبنى على رواية بنفس الاسم، أحداثه بتدور في الفترة ما بين الحرب العالمية الأولى والحرب الأهلية الروسية. جيغافو “عمر الشريف” شاب وسيم مقبل على الحياة هيقع في قصة حب واحدة متجوزة “لارا أنتيبوفا”، ومن خلال شخصية دكتور جيغافو، الفيلم هيستعرض التغييرات اللي حصلت بسبب الحرب؛ من ضحايا ونظام قمعي وناس مشردة في الشوارع. الفيلم تم إنتاجة سنة 1956 وفاز بخمس جوائز “أوسكار”، وبيعتبر واحد من كلاسيكات السينما العالمية، وده برغم الانتقادات اللي أتعرض لها في الأول بإنه اختزل من الأحداث التاريخية وكان طويل جدًا.
ومن القصص المضحكة اللي حصلت مع النجم في وقت افتتاح الفيلم إن جاله أكتر من 3 ألاف عرض زواج في أسبوع، وده بناءً على كلام صحيفة الاندبندنت البريطانية.
سري للغاية – Top Secret
قدم فيه دور كوميدي وده عكس الحاجات اللي كان بيعملها قبل كده، الفيلم كان عبارة عن “محاكاة” وسخرية من الأفلام الجاسوسية في وقت الحرب العالمية التانية .. وبنشوف فيه مطرب البوب “نيك ربفرز” وهو بيشارك في مهمة خاصة في ألمانيا وهي إنقاذ عالم مسجون بعد ما أتورط في حركة المقاومة الفرنسية، وفي نفس الوقت هيقع في حب بنت من فرنسا.. ياترى إيه اللي هيحصل بعد كده؟
الفيلم تم إنتاجه في 1984 وشارك في البطولة فال كيلمير وديفيد زوكر وجيم كاركتر، ومن تأليف وإخراج ديفيد زوكر. وقت وفاة عمر الشريف نعاه مخرج الفيلم وقال “السينما العالمية خسرت واحد من أهم الممثلين.. أتشرفت بالشغل معاه في سري للغاية”.
السيد إبراهيم وأزهار القرآن – Mr. Ibrahim and the Flowers of the Koran
الفيلم بيحكي عن قصة صاحب محل الكتب التركي “السيد إبراهيم”، اللي بيلعب دوره عمر الشريف، وصاحبه “مومو” البقال اليهودي، ماكانش بيتكلم مع حد بس قرر إن البقال ده يبقى هو صاحبه. بقال بسيط في شارع قديم وفقير في فرنسا، في الفيلم عمر كان بمثابة الواعظ والأب الروحي للطفل ده، بيعلمه دروس في الحياة عن الحب والمباديء والأخلاق والتسامح والرحمة .. الفيلم إيقاعه هادي يخليك تدخل في حالة تأمل وتتوه مع الفيلم .. شخصية عمر في الفيلم كانت بسيطة هتحبها وتتفاعل معها.
تم إنتاجه سنة 2003، والفيلم مش ديني زيّ ما يبان لك، الفيلم بيحكي عن البشر وازاي يقدروا يتعاملوا مع بعض باختلاف ديانتهم وكان عايز يوصل رسالة إن “الدين المعاملة”. عمر الشريف أخد على الفيلم جائزة “سيزار” لأفضل ممثل.