وقفة العيد في مصر لها شخصيات ماركة مسجلة، أنت مين فيهم؟

العيد بيهل علينا وبتشوف أنواع كثيرة من الناس، من البنات والأولاد خصوصًا يوم الوقفة، كل شخصية بتقضيه بشكل مختلف … تعالوا نشوف بيعملوا إيه اليوم ده وقولنا أكتر شخصية بتمثلك فيهم.

اللي بتقضيه في التنظيف

دي في الغالب بتبقى الابنه البارة، ووالدتها راضية عليها، بيقلبوا الشقة عليها واطيها، كإنهم أول مرة ينضفوا، ولازم تكسري السيراميك وتمسحي تحته، علشان في حتة تراب الوالدة الوحيدة اللي واخدة بالها منها.. وعلشان الناس اللي مش بييجوا لنا أساسًا يقولوا حاجة.

اللي بيخربها

وقفة العيد بتبقى فرصته الوحيدة علشان ينطلق ويشوف أماكن ويعمل حاجات جديدة، ومش عايزين نفسر أكتر من كده ونقول إنه بيجرب حاجات جديدة.. درينكات بقى وما شابه.

مشوار الكوافير

ماسكات بقى وباديكير ومانيكير وقص شعر، وفي الغالب بيصرفوا الشهر كله على المشوار ده، وفي اللي بتقعد في البيت برضه وبتعمل كله بس بتلجأ للطبيعة، ماسكات مياه الأرز لتطويل الشعر، وماسكات الزبادي والخيار لتنعيم البشره.

اللي بيروح السينما

ودول مدمنين السينما اللي مستنيين يوم الوقفة بفارغ الصبر، وفي الغالب برضه بيقضي كل أيام العيد هناك مستني أي فيلم ينزل.

اللي كل خططها بتبوظ

من كتر ما قعدت تخطط طول رمضان هتعمل إيه وتروح فين يوم الوقفة، وأهلها بيقولوا لها لأ وبتقعد في البيت في الآخر وتسمع أغنية صفاء أبو السعود “جانا العيد أهو جانا العيد”.

اللي بيروحوا مشوار الحلاق

وزيّ ما البنات عندها مشوار الكوافير يوم الوقفة، الشباب كمان عندهم مشوار أساسي عند الحلاق، التجمع السنوي بيبقى عنده، بتشوف هناك أعداد مهولة من البشر اللي عايزة تحلق، وبتشوف كمان قصات غريبة أول مرة تشوفها بتطلع من تحت إيده وبيبقى لها أسامي، قصة صلاح وقصة كرستيانو، كل ده كوم وصبغات الشعر كوم تاني.

البنت المخطوبة

ده نوع مش محتاجين نتكلم عنه لإنه بيتكلم عن نفسه، بتبدأ البنت اللي لسه مخطوبة في كتابة بوستاتها على السوشيال ميديا ومحتواها بيبقى كالآتي “العيد أحلى مع خطيبي” “هدايا خطيبي ليا في العيد” وتبدأ في استعراض الهدايا اللي تمنها في الغالب بيبقى مرتب شهرين لموظف لسه باديء حياته، وكإنها أول واحدة تتخطب ويعدي عليها العيد، ربنا يسعدكوا وكل حاجة بس بتصوروا لنا إيديكوا ليه؟

اللي مالوش في حاجة وبيقعد قدام التلفزيون

وده اللي مالوش في أي تجمعات ولا أي احتفالات من أي نوع، لا بيروح السينما ولا بيخرج مع أصحابه ومنعزل عن العالم، وقاعد على كنبته وبيسمع “والله لسه بدري يا شهر الصيام”.

أخركلمة:ماتفوتوش قراءة: أسئلة لازم تبقى مستعد لها في لمة العيد